Filmi "Indiana Jones" kommunistinit nuannarineqanngilaq

Indiana Jones isersortugaataalu pillugu filmiliaq allaat sovjetiusimasumik qinngarsuinertut – oqaluttuarisaanermillu piaaraluni allanngortitsiniartutut Sankt Petersborgimi kommunistit partiiannit nalilerneqarpoq, allaallu takutinnissaa inerteqqutaalersinniarneqarluni.

- Hitleri Amerika peqatigalugu ajusaaffigaarput, aamma USA Osama Bin Ladenimit akeqqiunneqarmat USA-mik illersuilluta. Maannali kommunistiussuseq meeqqanut ersisaarutaalerpoq. Inuit taamaaliortut kanngusunnginnerlutik, kommunistit partiiannit Viktor Perov oqaaseqarpoq.

Indiana Jonesimik filmiliami Harrison Ford inuttat pingaarnersaraat. Filmimi Indy niaqqumik saanikuinnarmik immikkut ittumik pissaanilimmik nassaarniaavoq nassaarniarnerminilu KGB-p kilitsissiaanit ajoqusersorniarluni. Kommunistit kilitsissiaattut Cate Blanchett inuttaavoq.

- Uagut arnartagut nazistitut isikkoqanngillat. Cate Blanchett immaqaana suliassaqanngeriarami filmiliaritinniaaannarsimasoq. Filmimi inuttaasut CIA-imut kiffakuluupput, Ruslandimut iseqqusaajunnaartariaqartut, partiimi ilaasortaq alla Andrej Gindos naliliivoq.

Filmili Ruslandimi tassa takuneqarsinnaalereerpoq, filmertarfinni 808-ni takuneqarsinnaalluni.

Filmi “Indiana Jones” Katuap filmertarfiani ippassarli takuneqarsinnaanngoreerpoq, Sisimiunilu Taseraliup filmertarfiani, juunip ulluisa 13-ianniit takuneqarsinnaanngussaaq.