Filmi "Hævnen" nersornaaserneqarpoq

Filmik ilitsersuisuuvoq Susanne Bier, filmimit "Den Eneste Ene og Brødre"-mit taaguutilimmit aamma nalunnginneqartoq.

Qallunaat filmiliaannik pingajussaa Golden Globe-imik aatsaat nersornaasiisoqarpoq. Aviisip Politikenip nittartagaani taama allaaserinnittoqarpoq.

Qujassuteqarluni oqalugiarnermini qallunaat oqaasii Susanne Bierip, tupaqqaqisup, quiasaarutigilaarpai.

- Filmimi inuttaasut naatsiiamik oqummiarlutillusooq oqaluttut akuerisinnaagassiuk qujanarujussuaq, oqarpoq.

Filmip, tuluttut taaguutillip "In a better word", nersornaatisinissaa ilimagineqarsimanngilluinnarpoq. Filmit allat, soorlu spaniamiut filmiliaat "Biutiful", ilimagineqarnerpaanut ilaagaluarpoq.

Zentropa Filmimeersoq, Peter Aalbæk Jensen, nutaarsiassamik kalerrinneqarami aamma tupaallaqaaq.

- Susanne Bierip tassa pitsaaqutaa. Kikkulluunniit peqataaffigisinnaasaannik paasisinnaasaannillu unamminartunik suliaqartarpoq, Peter Aalbæk Jensen, Politikenip nittartagaani issuarneqarpoq.

Filmit sorliit Oscarinnassanersut januaarip ulluisa 25-anni aalajangerneqassaaq, "Hævnen" tassani innersuunneqarpoq, soorlu aamma kalaalit filmiliaat "Nuummioq" innersuunneqartoq.