Filmi "Hinnarik Sinnattuilu" isiginnaariarluarneqarpoq

Filmi "Hinnarik sinnattunilu" takutinneqarsimasuni agguaqatigiisillugu amerlanerpaanit isiginnaariarneqarsimavoq. Kulturikkut illorsuup, Katuap, naatsorsuutaani tamanna takuneqarsinnaavoq.
januaarip 13-at 2010 06:35

Filmi juullikkunni takutinneqarmat inuppassuit isiginnaariarput, takutinneqarnerillu tamaasa inuit agguaqatigiissillugu 258-it Katuamut isiginnaariarsimapput - taamaasilluni inuit katillugit 2.839-t filmeriarsimallutik, tamannalu ajunngeqaaq.

- Ilimagisamit pitsaanerujussuarmik pivoq. Ajunngitsumik utertiiviginnittuinnarnik tusagaqarpugut, pingaartumik angajoqqaaniit, meeqqammi allamik eqqartuisimanngimmata, Hinnarik Kisiat eqqartorsimallugu, ingerlatsisoq Aka Hansen oqarpoq.

Filmi maanna Sisimiuni takutinneqarpoq, alutorineqaqalunilu, immikkullu marloriarluni takuteqqinneqartussaavoq. Aka Hansenip oqarnera naapertorlugu filmip sinerissap sinnerani takutinneqarnisasa maanna sulissutigineqarpoq.

- NAPA-miit seqersittaammik atornikuuvugut, illoqarfinni filmertarfeqanngitsuni taamaalilluni takutinneqarsinnaaniassammat, Aka Hansen nassuiaavoq.

"Hinnarik Sinnattunilu" qallunaatut allagartalersugaq Nuummi Katuami februaarip ulluisa tallimaanniit aqqarngata tungaanut takutinneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq