Filmi Eksperimentet akissarsitinneqarsinnaavoq
Filminik isornartorsiuisartut qaammatip ataatsip missaa qaangiuppat filminut akissarsiaritinneqartartoq nuimasoq, Bodil, agguaatilerpassuk, Kalaallit Nunaat aamma peqataalluartussanngorpoq.
Filmi, Eksperimentet, kalaaliaqqat pinngitsaalillugit Danmarkiliartinneqarnerannik filmiliaq, innersuunneqarpoq, Arnani Pingaarnertut Inuttamut, aamma filmimi Arnani Inuttatut Pingaannginnertut peqataasumut.
Ellen Hillingsø filmimi pingaarnertut inuttaavoq, 14-iniinnarnilli ukiullip, Laura Skaarup Jensenip, filmimi Karenimik ateqarluni inuttaasup, isornartorsiuisartut uummatai attorsimaqai.
- Nuanneqaaq - nuannersorujussuuvoq!
Laura Skaarup Jensen, innersuunneqarnissaminut ilimasunngilluinnarsimasoq, oqarpoq:
- Sisamanngormat unnukkut paasivara. Arpaannaq anaanannukarpunga, oqarfigalugulu: - Anaana, arnani Ukiup Isiginnaartitsisartuatut innersuunneqarpunga!
Laura Skaarup Jensen angajoqqaanilu Jyllandip Avannaani illoqarfimmi Storvordemi najugaqarput, qasigiannguarmiuuvorli, qulingiluanillu ukioqalernissami tungaanut Qasigiannguani najugaqarpoq.
Storvordemi atuarfimmi Tofthøjskolemi 8.klassemi maanna atuarpoq, siunissanilu pilersaarusioqqammerpaa:
- 10.klassi ilanngullugu atuaqqaassaanga, kingornalu gymnasiarlunga. Naammassigukkit sunngorusunnerlunga paasiumaarpara. Perorsaasunngornissara filmiliaritittartunngornissaraluunniit massakkorpiaq takorloorpara, Laura Skaarup Jensen oqarpoq. Atuarfilli paarisariaqaraluaqisoq filmimi inuttaaqqinnissani aamma misilikkusuppaa:
Filminik isornartorsiuisartut oqarnerat naapertorlugu piginnaaneq amigaataanngilluinnarpoq. Filmi tamakkerlugu eqqaassagaanni naliliisartunit assigiinngitsorpassuarnik isummerfigineqarpoq. Laurali nersualaarneqartaqaaq.
Filminik aviisimi Politikenimi naliliisartoq, Kim Skotte, ima allappoq:
- Niviarsiaqqatut Karenitut inuttaanermini Laura Skaarup Jensenimit ikiorluarneqaqaaq.
Aviisimilu Nordjyske Stiftstidendemi ima allapput:
- Niviarsiarannguaq Karen niviarsiaqqatut Aalborgimeersutut Laura Skaarup Jensinitut attortinnaqisumik piviusorpaloqisumillu inuttaaffigineqarpoq, aqqaneq-marluinnarnillu ukioqaraluarluni ussersornikkut oqaatsitigullu pikkoreqaaq.
Laura, angajoqqaani filmimilu inuttaaqatini peqatigalugit, februaarip ulluisa 20-anni Københavniliartussaavoq, nersornaatinik Bodilinik ulloq taanna agguaasoqassammat.
