Filmertarfimmi misigisassaq imaannaanngitsoq
Nunatsinni pinngortitarsuaq pingaarnertut inuttaavoq Mike Madigson-ip filmiliaani "Inuk"-mi, tassanilu filmiliornermi misiliisimanngitsut peqatigalugit suliaq inerissimavoq filmitut kusanartut attortinnartutullu, filmillu takoreernerani isiginnaartut eqqarsaatissinneqartarput.
- Siornatigut Kalaallit Nunaanni piviusulersaarusianik sanasarsimavunga qimussertarnerlu assut isumassarsiffigisimallugu. Taamaammat filmiliornissamut maani periarfissarsigama erngerlunga peqataaniarlunga nalunaarpunga. Suliaq 2008-mi aallartipparput taamaammat filmi sivisuumik pileriartorsimavoq. Suliarujussuuvoq, kisianni suliap naammassinera takullugu tulluusimaarpunga, amerikamiu filmiliortitsilluniluni ilitsersuisoq Mike Madigson, "Inuk"-mik suliarinnittoq.
Pingaarnertut inuttat ilagaat Gaba Petersen siornatigut filmiliaritissimanngitsoq. Taannali Uummannami meeqqat angerlarsimaffianniitilluni filmiliortumit inuttassatut piukkunneqalersimavoq. Aamma filmimik nunatsinniit suliarinnittooqataasoq Ann Andreassen ulluinnarni meeqqat angerlarsimaffianni ningiutut sulisuuvoq.
- Assorsuaq pikkunarpoq Uummannami meeqqat angerlarsimaffianneersut meeqqat filmiliaritittut takullugit. Filmimi peqataaneq meeqqat ulluinnarni inuunerannut assut sunniuneqarpoq inuunerammi nuannersuinnaasimanngilaq. Assut nersualaarpakka "Inuk"-mi peqataalluarmata, aamma qularutiginngilara peqataanertik puigunaatsorsiffigisimagaat siunissami nukittoqutigisinnaasaminnik, Ann Andreassen oqarpoq filmi tusagassiortunut takutinneqareersoq.
Filmiliorneq akisoorujussuuvoq Mike Magidson suleqataalu aamma aningaasartuutit matussutissaannik pissarsiniarnerminni aporfissaqarsimapput.
- Tassami filmiliortutut misigisimanartarpoq suli pitsaanerusumik suliarerusukkaluarlugu, kisianni taama eqqarsaraanni taava aningaasat amerlanerit pisariaqartinneqalersarput. Aningaasanik pissarsinissaq ajornaatsuinnaanngilaq kisianni qujanartumik Monaco-mi fyrstip Albertip aningaasanik tunissuteqarfigaatigut, filmip aallartisarnera najuuffigereerlugu suliniut assut nuannarileramiuk. Tamanna assorujussuaq nuannaarutigaarput, Mike Magidson oqarpoq assullu pissanngatiginerarpaa filmiliami kalaallinit qanoq isummersorfigineqarnissaa.
Filmiliornissamut isumassarsiaq ukiut arfineq marluk matuma siorna pinngorpoq isumassarsinermiillu piviusunngortitsinissap tungaanut aqqutaa majoqqaqarsimavoq. Taamaammat Ann Andreassen filmip piareerluni takoreeraa KNR.gl-ip naapippaa assut killitsisimaartoq.
- Filmip nunani tamalaani takutinneqarnissaata kingornanut takunissaa utaqqisinniarsimagaluarpara, qujavungali taama pinnginnama. Killitsippunga arlaleriarlungalu qullilillunga. Ilimagisimanngikkaluarparami Mikep suleqataasalu kalaallit pillugut filmiliaat taama kusanartigissasoq. Assorsuaq attortinnarpoq, Ann Andreassen oqarpoq.
Filmip imarisaa naatsumik eqikkassagaanni tassaavoq nukappiaraq sumiginnagaq Inuk Nuummiit Uummannaliartoq inuunini siumut saatinniarlugu. Tamanna nuannaarutiginngikkaluarpaa, kisianni filmip ingerlanerani piniartut Ikuma, Ole Jørgen Hammeken-mit inuttaaffigineqartoq, ilisarisimalerpaa taannalu aamma inuttut ajornartorsiuterpassuaqarpoq. Taakku ilorpiamikkut angalapput qanorpiarlu pisoqarnersoq filmertarfimmit takusariaqarpoq.
- Uannut misigisaq imaannaanngilaq isiginnaartitsisartutut misilittagaqanngitsut atorlugit filmiliorama. Naliginnaasumik ilitsersuisup mianersorfigisarpaa inuttaasut ikasarpallaalinnginnissaat. Uanili annikitsuinnartigut iluarseeqqusisarpunga. Qularutiginngivippara amerikamiut meerartaat taama angusaqarfiusinnaanngitsut. Taakkumi Brat Pitt aamma Sandra Bullock filmini fjernsynimilu takusakkatik ilaarniarsimassagaluarpaat. Uanili inuttaasut namminiussusertik atorpaat tamannalu filmimut assut iluaqutaavoq. Neriuppunga filmi kalaallit tigulluarumaaraat aamma qilanaarpunga qanoq isumaqarfigineqarnerata tusarnissaanut, Mike Magidson oqarpoq, taannalu filmiliortarnermini USA-mi, Frankrigimi Australiamilu 20-it sinnerlugit nersornaatisisarsimavoq.
