Filippinerit 1000-init amerlanerusut denguefeberimik toqquteqartut

Inuit januaarip aallaqqaataannit aggustip 24-ata tungaanut nappaammik tuniluuttartumik nappaateqarlutik toqusut 1021-usut 40 procentiisa missaat meeraapput tallimanit qulingiluanut ukiullit.

Maanna toqusut siorna piffissap taamaalinerani taama nappaateqarlutik toqusunut 622-usunut sanilliullugit amerlanerungaatsiartut, ministereqarfiup oqaatigaa.

Nappaammik tunillatsitsittut qaammat kingulleq amerliartulermata filippinerini denguefeberimik nappaalasoqartoq naalakkersuisuisa nalunaarutigaat. Denguemik nappaateqartut januaarimit maannamut 249.332-upput, siorna piffissap taamaalinerani 119.224-upput.

Nappaat nakkutigineqarsinnaanngitsoq

Naak nappaammik tuniluuttoqarnera annikilliartoraluartoq tuniluuttoqarnera suli nakkutigineqarsinnaalinngitsoq, ministereqarfimmi atorfillit qullersaata, Eric Domingop oqaatigaa.

- Aappaagu ukiup naanissaata tungaanut denguemut nakkutiginnittariaqarpugut, Eric Domingo oqarpoq.

Nappaat ippernat aqqutigalugu tuniluuttarmat innuttaasut ippernaajaanissamut tunuarsimaassanngitsut, Eric Domingop erseqqissaatigaa.

Denguefeber tassaavoq nunani kiattuni nappaat tuniluuttartoq.

Nappaammik tunillatsinnermit ullut pingasut 15-illu qaangiukkaangata nualluummut assingusut aamma mæslingeqarnermi anillannermut assingusumik takussuteqalertarpoq kiisalu tallit nissullu annernangaatsiartarlutik.

Nappaammik tunillatsinneq ajornerpaaffiani toqussutaasarpoq.

Statens Serum Institutip nunarsuaq tamakkerlugu taama nappaateqarlutik ukiumut toqusartut 20.000-init amerlanerunissaat missiliorpaa.