Nunanit allanit

Filippinerini silarlorujussuarmat inuit ikinnerpaamik 40-t ajunaartut

- Silap pissusaata allanngoriartornera sakkortunerusumik ajunaarnersuaqartarnermik sunniuteqartoq tamatuma ersersippaa, oqaaseqartartoq oqarpoq.
SCANPIX
Filippinerini silarlorujussuarnerata malitsigisaanik nuna sisummat qarsutsinersuaqarmallu, inuit ikinnerpaamik 40-t ajunaarput. Aamma inuit ikinnerpaamik 18-it maqaasineqarput, 43.000-illu angerlarsimaffitik qimattariaqarlugu. Assi © : Handout/AFP/Ritzau Scanpix
Allattoq Ritzau
oktobarip 17-at 2021 15:39
Nutserisoq Ivik Kristiansen

Filippinerini silarlorujussuarnerata malitsigisaanik nuna sisummat qarsutsinersuaqarmallu, inuit ikinnerpaamik 40-t ajunaarput. Aamma inuit ikinnerpaamik 18-it maqaasineqarput, 43.000-illu angerlarsimaffitik qimattariaqarlugu.

Nunami sapaatit akunnerata siuliani silarlorujussualernera nunap avannarpasissuani qeqertarujussuarmi, illoqarfiit pingaarnersaata Manilap inissisimaffigisaani, nunap immikkoortuini ikinnerpaamik pingasuni ajunaartoqarneranik aseruatiterujussuarnermillu malitseqarpoq.

Anorersuup sakkortussusaa silap pissusaata allanngoriartorneranut takussutissaasoq filippinerit ajornartoornermi ministereqarfianni oqaaseqartartoq, Mark Timbal AFP-mut oqarpoq.

- Silap pissusaata allanngoriartornera sakkortunerusumik ajunaarnersuaqartarnermik sunniuteqartoq tamatuma ersersippaa, taanna oqarpoq.

Anorersuaq Kompasu Filippinerini ulluni arlarlinni silarlutsitserujussuarpoq. Filippinerinit Kinamut Vietnamimullu pingasunngormat nikikkiartorpoq, anoraalu sakkukkilliartorluni.

Filippinerit 110 millioninik innuttaasoqartoq ulussaarsuarnit ukiumut agguaqatigiissillugu 20-riarluni eqqorneqartarpoq.

Aamma atuaruk