FIFA-p siulittaasua Nunatsinnut tikeraalerpoq
Sepp Blatterip, arsaattartut akornanni sunniuteqarnerpaajusup, Qaqortumi ivigaaraasanik arsaattarfiliaq nutaaq, FIFA-mit aningaasarpassuarnik tapiiffigineqarnermigut piviusunngortinneqartoq, takorusuppaa.
Tamatuma saniatigut FIFA-p siulittaasuata Nunatsinni arsaattartunut atugassarititaasut takorusuppai, minnerunngitsumillu pinngortitarsuaq misigisaqarfigererusullugu, GBU-p siulittaasua Lars Lundblad oqarpoq.
Sydafrikami aasaru nunarsuaq tamakkerlugu arsaannermik pissartanngorniunneq, juulip aqqarnani naasimaleriarpat, FIFA-p siulittaasua Nunatsinnukarniarpoq.
Tikeraat Qaqortumukarnissamik saniatigut Nuummut Ilulissanullu aamma tikeraarniarput.
DBU-p aamma GBU-p suleqatigiinnissamik isumaqatigiissutertik 2012-ip naanissaanut sivitsoqqammerpaat.
- Tamanna GBU-mit nuannaarutigineqaqaaq, isumaqatigiissutimmi kinguneranik, kalaallit sungiusaasut dommeriusartullu pingaarutilimmik ilinniarteqqinneqartarmata, GBU-mi siulittaasoq Lars Lundblad ilaatigut taama allappoq.