FIFA-p præsidentia nunatsinnukassaaq
Tikeraarnissaa Kalaallit Nunaanni Timersoqatigiit Kattuffiata GIF-ip siulersuisuini ilaasortap Frederik Lundbladip aamma generalsekretærip Claus Nielsenip Nunat tamalaat olympiadernermut ataatsimiitaliaata IOC-p Københavnimi ataatsimeersuarneranni peqataanerminni qulakkeerpaat, taama sermitsiaq.gl nittartakkamini allaaserinnippoq.
- Sepp Blatter qaaqqusissummik apuussivigaarput, aasarulu tikeraassaaq. Sulili ullulerneqanngilaq, kisianni naatsorsuutigaarput Qaqortumi nunatsinni ivigaaqqanik arsaattarfiliaq takuniareeruniuk Nuummukassasoq, GIF-ip siulittaasua Nuka Kleemann ilisimatitsivoq.
Arsaattartut Kattuffissuanut FIFA-mut Kalaallit Nunaata ilaasortanngornissaa ukiorpaalunni kissaatigineqarsimavoq.
- Taamaammat-una Sepp Blatter tikeraarsaripput. Kisianni angutaavoq ulapittorujussuaq, taamaattumik ulluni arlalinni Qaqortumiissinnaanngilaq. Ulluni ikinnerpaani maaniissappat nunatsinni silaannakkut angallassineq pissutigalugu timmisartumik attartortariaqassalluta ilimagaarput. Immikkut iliuuseqartariaqarumaarpugut, Nuka Kleemann oqarpoq.