FIFA-mi ilaasortat taasinissaminnik akilersinniarsimapput
Arsaannermik nunarsuarmi 2018-imi pissartanngorniunnerit sumi pissanersut, sapaatip-akunneri arfinillit qaangiuppata, FIFA-p aqutsinermut komité-anit, 24-nik ilaasortaqartumit, aalajangiiffigineqassaaq.
Ilaasortat marluk tuluit aviisiata Sunday Timesip videoliaani, qanoq taasinissaminnik tuniniaasut, maanna takuneqarsinnaapput.
Taakku aappaat tassaavoq Amos Adamu, Nigeriamiu, taassumalu USA-mik illersuilluni taasissaguni 8 millionit dollarsinik akilerneqarnissani neqeroorutigaa. Aningaasat taakku Nigeriami arsaattarfiliornernut atorneqarnissaat takorloorpaa.
Reynald Temarii Tahitimiu, qeqertarmiut arsaannermut kattuffiannut siulittaasuusoq, taasinissaminik aamma tuniniaavoq. Taassuma videoliami oqaatigaa, 2,4 millionit dollarsinik piumasaqarluni, taakku New Zealandimi timersornermut ilinniarfiliornermut atorniarpai.
FIFA-p malittarisassai naapertorlugit taamatut isumaqatigiissuteqarneq inerteqqutaavoq, taamaattumik kattuffissuup pisoq misissuiffigileruttorpaa.
FIFA-p præsidentiata, Sepp Blatterip, kattuffissup nittartagaani kikkut tamaasa qinnuigai, pisup misissuiffigineqarnerani oqaaseqarnaveersaaqqullugit.
- Suliassami matumani qanoq pisoqarnera ilisimatitsissutigisassavara. Maannamuugallartoq pisoq pillugu avammut oqaaseqarnaveersaaqqullusi qinnuigaassi, Blatter kajumissaarivoq.
