Fidel Castro sikaamik qaartartulimmik toqoriarneqarsimavoq
Cubami siuttuusimasoq, Fidel Castro, imaannaanngitsumik inuuneqarsimavoq. Castro pillugu TV-kkut isiginnaagassiani nangeqattaartuni takuneqarsinnaavoq terlisaarilluni pinerleeriarnerit 683-it anigorsimagai.
marsip 11-at 2010 05:44
Isiginnaagassiani nangeqattaartuni soorlu takuneqarsinnaavoq, USA-mi naalagaaffeqatigiit isertortumik paasiniaasartuisa, CIA-p, akeravissuartik kommunistiusoq, Fidel Castro, qanoq ilillutik ukiuni arlalinni toqunniartarsimagaat, Danmarkip Radioata nittartagaani tamanna atuarneqarsinnaavoq.
CIA-p ilaatigut sanatissimavaat sikaaq qaartartulik masassiullu toqunartulersugaq.
TV-kkut isiginnaagassiaq assinik toqqorsivimmeersunik ilaatigut imaqarpoq, aammali assinik piviusuunngitsunik imaqarluni, naalagaaffimmi pissutsinut ministereqarfimmi sulisut, politikkimik paasisimasaqarluartut filmiliornermilu ilitsersuisut isiginnaagassiani ilaatigut nassuiaatinneqarput.
