Februaarip 8-nni Folketingimut qinersissaagut

Ministeriunerup Anders Fogh Rasmussen-ip februaarip 8-aanni Folketingimut qinersisoqarnissaa ullaaq nalunaarutigaa.

Taamalilluni Folketingimi ilaasortat 179-iusut qineqqusaarnerat aallartippoq. Folketingimut qinersinissaq januaarip 4-aanni avammut nalunaarutigineqartussaagaluarpoq, Asiamili ajunaarnersuarmit kiisalu Danmarkimi kommuneqarfinnik aaqqissuusseqqinnermik kinguarsarneqarpoq.

Folketingimut qinersisoqalerpat nunarput sinnerlugu ilaasortassanik marlunik aamma qinersisoqassaaq, nunatsinnilu partiit qinigassanngortitaminnik nalunaaruteqarnissaminnut januaarip 28-ianni ulloqeqanut kingusinnerpaamik periarfissaqartut, naalagaaffiup sinniisaa Peter Lauritzen ilisimatitsivoq.

Nunatsinni partiit folketingimut qinigassanngortinniakkatik tamakkivillugit suli saqqummiutinngilaat, Siumulli sinnerlugu qinigassat periareeqqapput tassaallutik, Doris Jakobsen, Ole Aggo Markussen, Lars-Emil Johansen, aamma Marianne Jensen. Inuiat Ataqatigiit nalunaarput siulersuisuunerit ualeru ataatsimeereerpata kikkut qinigassanngortinniaritik nalunaarutigiumaarlugu, IA-meersoq Kuupik Kleist, Folketingimilu ilaasortaasoq qinigassanngorteqqissalluni ilisimatitsereerpoq.

Ministeriunerup qinersinissaq nalunaruutigeerpagu Atassut sinnerlugu qinigassanngortitatik saqqummiutissagitik, Atassutip siulittaasua Augusta Salling oqarpoq.

Demokraatit Folketingimut qinigassanngortippaat siulittaasortik Per Berthelsen tullersortaalu Palle Christiansen.

Kattusseqatigiit siulittaasuat Anthon Frederiksen oqarpoq qinersinissaq nalunaarutigineqareerpat qinigassanngortitassatik saqqummiukkumaaritik.