Februaarimi AllStarsimut misilitsitsisoqassaaq
Tassa februarip qaammataani Nuummi Københavnimilu erinarsortartunik piukkunnarnersiuisoqassaaq. Nuummi piukkunnarnersiuineq februarip 9-aani Katuami pissaaq.
Kinaluunniit kalaallit nunaannut attuumassuteqartoq ’Julie AllStars’-imut ilaajumalluni misiliisinnaavoq. Tassa erinarsoqatigiinnut ilaajumagaanni kalaallit nunaat inuunngorfigisimasariaqanngilaq alliartorfigisimasariaqarnaguluunniit. Ilanngukkumagaannilu immersugassaq immersorneqassaaq erinagissuserlu misiligarneqassalluni. Ilaatigut suut sunngiffinni soqutigineqarnersut, suullu pikkoriffigineqarnersut, saniatigullu nammineq isumaq malillugu kalaallit nunaata pitsaasortai ajortortaalu pingasuk immersugassami allanneqassallutik.
Julie AllStars ajugaassappat pinnatassat 250.000 koruunit peqatigiiffimmut Nanu Børn-imut tunniunneqassapput, peqatigiiffillumi Juliap angajuata pilersitaraa.
Erinarsoqatigiit Københavnimi sungiusartassapput. Peqataasullu Kalaallit nunaaneersut Danmarkimiinnerminni angalanerat, najugaqarnerat nerisaqarnerallu akiliunneqassaaq. Peqataasussalli marsip qiteqqunneraniit majip naalernerata tungaanut Danmarkimi najugaqarallarnissaat naatsorsuutigisariaavoq. Tassa Issittup erinarsoqatigiivi AllStars-ikkut Katuami februarip 9-aani, Københavnimilu februarip 21-ani nanineqassapput.