FBI-imi atorfilik Watergate-mik nalunnginnittoq toquvoq

USA-mi ukiorpassuarni isertorlutik paasiniaasartuni FBI-imi atorfilik, naalakkersuinikkut pinerlunnermik, Watergate-mik taaneqartartumik nalunnginnittoq, Mark Felt peruluttut napparsimmavianni ullumi toquvoq.
Allattoq Jaaku Lyberth
decembarip 19-at 2008 16:50

- Inuit præsidentertik peqquserluttuunersoq paasisariaqarpaat, uangalu peqquserluttuunngilanga, Richard Nixon 1973-imi oqalugiarnermini oqarpoq. Mark Feltilli nalunngisaminik tusagassiortunut oqaluttuartarnerata kingorna præsidenti, Richard Nixon 1974-imi tunuarpoq. USA-p oqaluttuarisaanerani siullerpaajulluni maanaannaq præsidentiunerminit tunuarluni.

Uppernarsaatit Mark Feltip, Deep Throatimik taaneqartartup tusagassiortunut, Bob Woodwardimut Carl Bernsteinimullu tunniussai pisuullutik Nixon tunuarpoq. Mark Feltip kinaassusaa ukiorpassuarni tusagassiortunit taamaallaat nalunnginneqarpoq. Pisimasut filmiliarineqarnerat ungasinngitsukkut KNR-TV-kkut takutinneqarpoq. Mark Felt isertungaarami oqarasuaatilluunniit atornagit tusagassiortoq Woodward biilit uninngasarfiini toqqortorluni naapittarsimagaa ukiorpaaluit qaangiummata aatsaat paasineqarpoq. Mark Felt Woodwardip suliffiani aviisimi nalunaaruteqarniartarsimavoq, Woodwardillu naasuutini igalaat saavaniittoq nikisillugu Mark Feltimut akissuteqartarsimavoq. Bob Woodwardip Mark Felt sapiitsuliorluni præsidentimik uppisitsisutut nersualaarpaa. Naalakkersuisummi akornanni peqquserlunnerit isigiinnarnagit ulorianartorsiorluni naapertuilluarluni iliuuseqarpoq, inatsisaatsuliornerillu unitsillugit.

Mark Felt 95-nik ukioqarluni toquvoq.