Faxe Cup naammassivoq
Arnat assammik arsartartut nunatsinneersut Danmarkimilu Lyngbymeersut ukioq manna Faxe Cup-imik taallugu Nuummi Inussivimmi unamminerat naammassivoq. Ukioq manna Faxe Cupimi pissartanngorput Danmarkimeersut Lyngby HK, unammisaat kalaallit Danmarkimi ilinniagaqartut unammisartui Ligalandsholdit normu 2-nngorput. Lyngby HK Ligalandsholdillu unamminerat 29-25-mik inerneqarpoq.
Arnat Faxe Cup-imi unamminerannut peqataapputtaaq Aqissiaq Maniitsumeersut, SAK Sisimiuneersut Nuummeersullu Nuuk GSS-ilu. Ullumi normu tre-nngorniunnermi GSS SAK-lu unammipput tassanilu SAK 30-nik isertitaqartut GSS 32-nik isertitaqarlutik ajugaapput.
1991-imili Faxe Cup unammissutigineqartalerpoq. Ukioq mannalu 15-issaannik Faxe Cupimi Danmarkimit unammeqataasoqarnera sungiusaasup aaqqissuusseqataasartullu Kristian Heilmannip ima nassuiarpaa:
- Lyngbymiut qangali Nuup kommuneanit ikinngutigineqarnerat aqqutigalugu suleqatigisaratsigit, meerartatsinnik inuusuttatsinnillu Danmarkiliartitsisaratta Faxe Cupip ukiunik 15-nngortorsiorneranut atatillugu peqataanissamut qaaqquvagut.
Kristian Heilmann oqarpoq Lyngby Faxe Cupimut nunatsinnit peqataasoqartarnera nunatsinni assammik arsartartunut assut iluaqutaasartoq.
- Ingammik ukioq manna takusinnaavara nunatsinni assammik arsartartut arnat siuariaateqarsimasut. Arsarnermik paasinninnikkut teknikkillu tungaatigut.
