Faxe Cup ingerlalluarpoq
Arnat assammik arsarlutik unammisaqattaarnerat Faxe Cup ingerlalluarpoq aamma arnat inuusuttut 18-it inorlugit ukiullit nunanut allanut unammisartut siullermeerlutik ippassaq unammipput. Unammisaqattaarnerit ulluisa aappaanni holdit unammeqataasut tamarmik - Kâgssagssuk kisiat pinnagu - pointinik marlunnik angusaqarput. Taamaattumik kikkut bronzinnanniutissanersut, kikkullu ajugaaniutivissanersut pissanangarsivoq. Boas Møller GSS-imeersoq taama ilisimatitsivoq nangillunilu:
- Ippassaq Nûk aamma U18-it unamminissaat qilanaarisimasarput ingerlanneqarpoq. Nûk illoqarfimmi unammisarnerni ilisimavarput, pissangassutigalugulu inuusuttut nunanut allanut unammisartut qanoq ineriartorsimanerat takussallugu. Paasinarpoq ”nivissat” pitsaasumik ineriartorsimasut, tamannalu sungiusaasup Preben Clausen-ip piareersaalluarsimaneranut ersiutaavoq. Unamminerup takutippaa nunanut allanut unammisartut sukkanerungaatsiartut aalassarinnerullutillu, taamaattumillu tupinnarpallaanngilaq 32-24-mik ajugaammata, nikinnermi 14-12-imik siuaqqasimallutik.
