Faxe Cup-imi arnat assammik arsarlutik unammisaqattaarnerat ullumi naggaserneqarlutik bronze-nnanniunneq finalilu Nuummi Inussivimmi ingerlanneqassapput.
Bronze-nnanniunnermi marlunut aallartinneqartumi unammipput Kagssagssuk Maniitsumeersut S 68-lu Sisimiuneersut. Bronze-nnanniunneq naammassippat finale-lu pitinnagu sisamat qeqqanut nukappiaqqani GSS aamma NÛK tamarmik Nuummersut unammeqqaassapput.
Finale aallartissaaq tallimanut tanneq qulingiluat, tassani GSS aamma NÛK tamarmik Nuummersut unammissallutik.
Unamminerit pissanganartorujussuussagunarput. Bronze-nnanniuttussat S 68 Kagssagssuk-lu unammisaqattaarnerni naapeqqaaramik naligiittorujussuullutik unammipput, Kagssagssuk mål-inik marluinnarnik S 68-imut ajugaagami tassa 27-25-mik ajugaallutik.
Finale-mi unammisussat GSS aamma NÛK unammeqqaaramik naligiillutik unammipput, 28-28-mik unammineq inerneqarluni.