Fatah Hamasilu partiilioqatigiipput

Palæstinami suliniaqatigiiffiit marluusut Fatah aamma Hamas ataatsimoorlutik naalakkersuisunik pilersitsinialerput. Saudi Arabiami ullut marluk isumaqatigiinniareerlutik tamanna isumaqatigiissutigaat.

Ippassaq unnukkut Gazami eqqartoqarpoq. Tamatumuuna Palæstinamiut nuannallutik eqqarput. Tassa suliniaqatigiiffiit annerit marluusut, præsidentiutitaqartut Fatah-p aamma muslimit suliniaqatigiiffiata Hamasip naalakkersuisoqatigiilerniarlutik isumaqatigiissimanerat nuannaarutigigamikku.

Ippassaq tusarliunneqarpoq præsident Mahmoud Abbasip Ismael Haniya Hamasip naalakkersuisuutitaaneersoq maanna naalakkersuisoqatigiinnik 25-nik ministerilinnik pilersitsisussatut toqqarsimagaa. Taakkunannga qulingiluat Hamasip, suleqatigiiffinni annersaasutut, ministeriutitarissavai. Fatah-p ministeriutitassai arfiniliussapput, ministerillu qulit suliniaqatigiiffinnit assigiinngitsuneersuussallutik.

Palæstinamiut neriuutigaat naalakkersuisoqatigiit nutaat ullut tamaasa akersuuttuarneq akiniaaqattaannerlu unitsissinnaassagaat, innuttaasullu imminnut sorsuutilernissaat pinngitsoortissinnaassagaat. Aamma nunat killiit aningaasaliissutigisartagaat dollarsit millionilikkaat, Hamas siorna naalakkersuisunngortitsimmat unitsissimasaat, aallarteqqinneqarsinnaassasut neriuutigaat.

Isumaqatigiinniarnermi præsidentip aamma Fatah-p ilungersuutigisimavaat Hamasip Israel naalagaaffittut akuerissagaa, soorlu Arafat-iugaluaq taamaaliorsimasoq.

Hamas-ip Israel akuersaarumasimavaa, Arafatilli nalaani isumaqatigiissutit maleqqissaarneqarnissaat akueriumanagu.

Sapaatip akunneri arlallit qaangiuppata naalakkersuisunngortussat katersuussinnaanissat ilimagineqarpoq, tamatumalu tungaanut nunanit allanit malinnaaffigeqqissaarneqarnissaat naatsorsuutigineqarpoq.