Fatah Hamasilu isumaqatigiinnialerput

Palæstinami pisut saalaassavagut – inatsisartut ataatsimiittarfianni aqqusinernilu eqqissilliviilliornerit sapaatip-akunnerini arlalinni pereersullu Palæstinami partiit annerit marluk Fatah Hamasilu perulluliornerit unitsinniarlugit isumaqatigiinnialerput. Imminnut unammiuarsimapput massakkulli mattullutik isumaqatigiinniarsarillutik. Pappilissat atugassat illuatungeriit iliinit paarnaarussivimmiittunit allaanneqarsimapput tassanilu Israelip naalagaaffittut namminersulernissaa siunnersuutigineqarsimavoq.

Palæstinami januaariugaa qinersisoqarmat Hamasikkut isumaqatiginninniarnermi qinersinermi ajugaapput taamanikkumiillu Hamasikkut naalakkersuisunngornissaat nunarsuarmioqatigiinnit iluarineqanngilaq ingammik illuatungiliuttunit Fatah-kunnit iluarineqarani. Hamasikkut naalakkersuisunngorniarnerat imaannaanngilaq; aningaasamiilersimapput allaat pisortat suliffeqarfiutaanni atorfillit aningaasarsiassaqartinneqaratik naalakkersuinermilu suliaqartunit allanit ikiorneqarumanatik kiisalu isumannaallisaasussatut atorfeqartinneqartunit aamma sissuerneqarumanatik.

Naatsumik oqaatigalugu Hamasikkut isumaqatiginninniarnissaminnut pinngitsaalisaapput taamaalillutillu illuatungeriit sakkulersoratik naalakkersuinermik suliaqarlutik Israelip namminersortutut inissinnissaa isumaqatiginninniutigisariaqalerpaat. Isumaqatigiissinnaaneralli kisimi apeqqutaalissaaq. Isumaqatigiittoqarnissaatalu tungaanut USA-p EU-llu aningaasaliissutissatik unitsikkallaarnikuuvaat. Fatah-kunnik illersuisut qinersinermi ajorsartuusut aamma apeqqutaalissapput akuersisinnaanersut imaluunniit pissaanermik piginniinnarusullutik sorsukkusulissanersut.