FaroeJet matuinnaqqajaavoq

Savalimmiuni timmisartuutileqatigiit, FaroeJet, matuinnartariaqalivissut, angallassinermut tunngasunik nutaarsiassaqartitsivik, Travel People, ippassaq allappoq.

FaroeJet Savalimmiunit Københavnimut uterlugulu ukiormanna maajip qaammataagaa timmisartuussisaleramili naatsorsuutigisamit ilaasukinnerusimavoq.

Allaat juulip qaammataani, savalimmiormiut angallannerpaaffianni, timmisartumi issiaviit 40 procenterinngisaaluunniit atorneqarsimapput, timmisartuutileqatigiiffimmut assut ajunaarutaasumik.

FaroeJet-imi pisortaanerup, Johan Simonsenip, Savalimmiut TV-ani apersorneqarnermini, nunaqqatini tapersersuineroqqullugit kaammattorpai, matunissartik aarlerinarsimmat.

- Savalimmiut kisermaassilluni timmisartuussinermik ingerlatsiviuleqqissanngippata, tapersersuisariaqarpusi. FaroeJet matuppat, naalakkersuisut piginneqataaffiat, Atlantic Airways, kisiat Savalimmiuni innuttaasut periarfissarilissavaat, Johan Simnsen oqarpoq.

Kisianni qanoq amigartooruteqartiginerminnik oqaaseqanngilaq, eqqoriarneqarporli amigartoorutit maajimiit ullumimut 15 millioni koruunit missaanniissimassasut, tassa piginneqatigiiffiup aningaasaataasa 25 millionit affaanit sinneqartut.