Facebookip profilit ilumuunngitsut 5,4 milliardit piiarai
Facebook taama ilisimatitsisoq, nutaarsiassaqartitsiviup AFP-p allaaseraa.
Isumannaallisaaneq annertusarlugu Facebookip nalunaarutigaa, profilillu ilumuunngitsut minutsialunnguaannaat atasimasullugu peertarnerarlugit.
- Profilit ilumuunngitsut millionilikkaat ullormut peertarlutigit eqqoriarparput, atortullu tamakkuninnga malussarniutit tassani atortarlutigit.
Facebookimi ukiup massuma ingerlanerani atuisut profiliisa 5 procentiisa missaat ilumuungitsuusut, Facebookip nalilerpaa.
Facebook aqqutigalugu uumissuinerit, paasissutissanillu ilumuunngitsunik siammarterinerit nalunaarusiami nutaami isornartorsiorneqangaatsiarput.
Facebookimi najoqqutassanik malinninnani Facebookikkut saqqummiussat 10 millioninit amerlanerusut ukiup affaata kingulliup ingerlanerani peersimallugit, Facebookip nalunaarusiami ilisimatitsissutigaa.
Meeqqanik atornerluinerit, imminullu toqunnerit pillugit allaaserisat, nioqqutissanillu unioqqutitsilluni tuniniaanerit peerneqarsimasunut ilaapput.