Facebookip likes-it amerlassusaat toqqorterlugit misilittaraa
Facebook likes-it amerlassusaannik toqqorterineq Australiami misilittarppaa.
Nittartakkatigut attaveqaqatigiittarfik tallimanngornermi taama paasissutissiivoq.
Australiami Facebookimik atuisartut allat liker-inerannik, qisuariaateqarnerannik videollu qanoq amerlatigisunit takuneqarsimanerannik takunnissinnaassanngillat, atuisulli nammineq saqqummersitaminni qanoq amerlatigisut qisuariarnersut takusinnaassavaat.
Facebookip taamaaliorluni misiliinerani inuit nittartakkatigut attaveqaqatigiittarfimmi naqisimaneqartutut misigisimasinnaanerannik annikilliiniarneruvoq.
Facebook unammillertinit malinneqassanngitsoq
- Facebook unammillertutut isikkoqartikkusunngilarput, Facebook nalunaarummi paasissutissiivoq.
- Misiliineq manna inuit qanoq qisuariaateqarnissaannik takunninniarneruvoq.
- Piffissap ingerlanera ilikkagaqarfigalugu allanut siaruarsinnaanissaa neriuutigaarput.
Misiliineq qanoq sivisutigissanersoq Facebookimit oqaatigineqanngilaq.
Mia Garlick Australiami Facebookimi politikkikkut pisortaavoq, taassuma misiliinerup nunani allani atulerneqarnissaanik oqaaseqarnissaq siusippallaartoq, nutaarsiassaqartitsivimmut, The Guardianimut oqaatigaa.
Instagramimi likes-it aamma toqqorterneqartut
Inuit milliardinit amerlanerusut Facebookimik atuisuupput, taamaakkaluartorli nittartakkatigut attaveqaqatigiittarfiit inuit sianissusaannut sunniinerluttarnerarlugit isornartorsiorneqartarput.
Facebookip nittartakkatigut attaveqaqatigiittarfik Instagram aamma pigaa, Instragramimilu likes-it toqqorterlugit misilittaaneq aasaq aallartinneqarpoq.
Misiliineq taanna Canadami aallartinneqarpoq, maannalu Australiami, Brasiliami nunani allani atuiffiunerusuni aamma atuulluni.
/ritzau/AFP
