Facebook aqqutigalugu attaveqaqatigiinnissamut periarfissat soorlu Instagram, Messenger WhatsAppilu atorneqarnerulerput, taakkuninnga atuineq 70 procentinik annertuseriarluni, pingaartumik Italiami, coronavirusimik eqqorneqarpaaffiusumi.Assi: Stock Catalog/Flickr

Facebookimik nunani coronaviruseqarfiusuni atuineq annertuseriartoq

Coronavirusimik ajornartoorneq pissutaalluni nalinginnaasumik attaveqaqatigiinneq ajornakusoorpoq. Tamanna inuppassuit Facebookimik atuinerulernerannik kinguneqarpoq.

Facebookimik atuineq qaammatip kingulliup ingerlanerani annertuseriangaatsiarsimavoq.

Assersuutigalugu nunani coronavirusimik eqqorneqarnerpaaffiusuni allakkanik Faceboookikkut nassiussisarneq 50 procentinik annertuseriarsimavoq.

Facebookip nittartagaani tamanna atuarneqarsinnaavoq.

Coronavirusip tuniluutilernera pissutaalluni inuppassuit angerlarsimaannarrapput. Tamanna pillugu ikinngutit ilaquttallu qanimut attaveqarfigineqarsinnaanatik.

Video aqqutigalugu attaveqaqatigiinneq aamma annertuseriangaatsiartoq

Inuit tamanna pillugu inuit internettikkut attaveqaqatigiittarfiit Facebookitut ittut atornerulersimavaat.

Facebook aqqutigalugu allakkanik nassiussisarnerup nunani coronavirusimik eqqorneqarnerpaasuni annertusinerata saniatigut, video aqqutigalugu attaveqaqatigiinneq qaammatip kingulliup ingerlanerani aamma annertuseriangaatsiarsimavoq.

Facebook aqqutigalugu attaveqaqatigiinnissamut periarfissat soorlu Instagram, Messenger WhatsAppilu atorneqarnerulerput, taakkuninnga atuineq 70 procentinik annertuseriarluni, pingaartumik Italiami, coronavirusimik eqqorneqarpaaffiusumi.

Isummersuutit