Facebookimik atuisut amerligaluttuarsinnartut
Inuit 1,66 milliardit Facebookimik maanna atuisuusut, Facebookip naatsorsuusiaani allaaserineqarpoq. Ilimagineqartumiit tamanna annerulaarpoq, tassami 1,65 milliardit ukiup taamaalinerani atuisuulersimanissaat ilimagineqaraluarmat.
Naak Facebookip kaaviiaartitai 25 procentinik amerlillutik 143 milliardit koruuniugaluarlutut, Facebookip oqaluttuarisaanerani qaammatit pingasut ingerlaneranni atuisuulersut aatsaat taama ikitsigipput. Nutaarsiassaqartitsivik Bloomberg News taama allaaserisaqarpoq.
Suliffeqarfiup siorna qaammatini kingullerni pingasuni aningaasartuutai taassuma saniatigut 34 procentinik aamma amerlipput 83 milliardit koruuniulerlutik.
Facebookip naatsorsuusiai ippassaq pingasunngornermi saqqummiunneqareersullu aktiaasa nalingi appariangaatsiarput.
Facebook politikerinit atuisuniillu ukiuni kingullerni isornartorsiorneqarpoq, suliffeqarfiup inuit pillugit paasissutissanik atuinera isornartorsiorneqangaatsiarluni.
Facebookip inuit ataasiakkaat, suliniaqatigiiffiilluunniit nutaarsiassaqarfiilluunniit paasissutissanik ilumuunngitsunik siammarterinerannut iliuuseqarpallaannginnera aamma isornartorsiorneqarpoq.
