Facebookimi tillitanik tuniniakkat sianigikkit

Inuit pigisaannik tillitat nittartakkakkut tuniniarneqarnerat naammattoorneqakulanerulersimanerat, Kalaallit Nunaanni Politiit maluginiarpaat.
Assi © : Facebook Screendump/KNR
Allattoq Ivik Kristiansen
marsip 10-at 2015 04:46

Pisiniarfiit nakkutiginninnermi atortutik aamma misissornerulersimagaat politiit oqaatigaat.

- Tillitanik Facebookip immikkoortortaani KØB-SALG-BYTTE-mi tuniniaasoqarneranik nalunaartoqarneratigut tillinniarsimanermik suliaq sapaatit-akunnerat kingulleq naammassivarput. Nakkutilliinermut atortut aqqutigalugit pisiniarfinni tillinniartoqarsimaneranut suliat amerlanerit aamma paasisalernikuuvagut, Kalaallit Nunaanni Politiit allapput.

Inuit pigisaminnik tillinneqarsimasunik Facebookip immikkoortortaani KØB-SALG-BYTTE-mi tuniniarneqartunik naammattuisimallutik politiinut saaffiginnittut amerlanerulersimapput.

 

Suliat amerlanerit naammassineqartalersut

Taamaammat tillittoqarsimatillugu suliat politiinit naammassineqartut amerlanerusut, Kalaallit Nunaanni Politiini pigaartuunerup Bjørn Bjerregaardip oqaatigaa.

Politiillu allamik aamma nuannaarutissaqarput.

Pisiniarfinni sulisut nakkutiginninnermut atortutik misissornerusalersimammatigit, tillinniarnerit amerlanerit aamma paasineqartalersimasut, Bjørn Bjerregaardip oqaatigaa.