Inuit pineqartut tassaapput arnaq 18-inik ukiulik angutillu 19-inik, 23-nik, 24-nik aamma 27-nik ukioqartut. Angut 23-nik ukiulik tigummigallarneqarpoq, ilaalu sisamat tillinniarsimasutut matumanilu tillittutut pasineqarallarlutik.Assi: Rigspolitiet

Facebookikkut tuniniaasoqarmat pasinnittoqalertortoq

Inuit tallimat illoqarfiit pingaarnersaanni sisamanngornerup unnuaani tillinniarsimasutut pasineqarput. Inuup alapernaatsup politiit paasisaqapallatsippai.

Nuummi angerlarsimaffinnut arfinilinnut sapaatip akunnerata siuliani sisamnngornerup unnuaani tillinniartoqarpoq.

Innuttaasulli eqqugaasut ilaat qujanartumik alapernaappoq politiillu suliamut atatillugu paasisaqapallatsillugit.

Kalaallit Nunaanni politiit pigaartuisa pisortaat, Julie Senderovitz Bendtsen, taama oqarpoq.

- Innuttaasoq alapernaatsoq tamatumanik qujassutissaqarfigivarput, taassuma tillinniartoqarneranit akunnialuit qaangiuttut sianerfigaatigut. Taassumami tillinneqarsimasut ilaat Facebookikkut quppernermi køb-salg-byttekkut pigisani tuniniagaagunartoq oqaatigaa.

Taama pimmat politiit pasineqartuni misissueqqissaarput. Tillitanik arlalinnik nassaartoqarpoq, politiillu nalunaarutiginnittoqaqqaarneranit ulloq ataaseq qaangiutinngitsorluunniit inuit tallimat unnerluutigaat.

- Taakku unnuk taanna unnerluutiginnissutigineqartuni arfinilinni tamani tillinniarsimasutut ilaatigut pasivagut, kisianni soorunami misissueqqissaaqqissaagut. Taakku aamma siusinnerusukkut tilliniarsimasutut aamma pasivagut.

Inuit pineqartut tassaapput arnaq 18-inik ukiulik angutillu 19-inik, 23-nik, 24-nik aamma 27-nik ukioqartut. Angut 23-nik ukiulik tigummigallarneqarpoq, ilaalu sisamat tillinniarsimasutut matumanilu tillittutut pasineqarallarlutik.

Nioqqutissanik pisinnginninni eqqarsarluaqqaartarit

Tillinniartut nioqqutissanik tuniuminartunik tillinniarnerusartut Julie Senderovitz Bendtsenip oqaatigaa. Taakku tassaasinnaapput oqarasuaatit angallattakkat, qarasaasiat, Ipadit, pinnersaatit, sanalukkat, aningaasat biilinullu matuersaasit nuisaannarpata.

Taamaammat inuit nioqqutissanik Facebookikkut assersuutigalugu køb-salg-byttekkut nalinginnaanngitsumik akikitsumik pisitikkatik eqqarsarluaqqaartarnissaat taassuma aamma innersuussutigaa.

- Nunatsinni innuttaasut tillitanik pisinaveersaarnissaannik kaammattuuteqarfigerusuppakka, tillitanimmi pisisoqartanngippat tillinniartoqartarnavianngilaq, pigaartut pisortaat oqarpoq, nangillunilu:

- Aqqusinermi nittartakkatigulluunniit nalinginnaanngitsumik akiginiaasunik takuguit tillitaasorigukku taava pisiarinagu politiinut siarngutigiuk.

Tillitamimmi pisinermi tillikatanik pisisutut unnerluutigineqartoqarsinnaavoq. Tuniniarneqartoq ajunngippallaartoq naatsorsuutigineqarsinnaappat taamaaliortoqarsinnaavoq.

Assersuutigalugu Facebookikkut nammineq tuniniaasut saniatigut nioqqutissat tillitat pisiniarfiit saanni tuniniarneqakkajuttarput. Inuinnarnit nioqqutissanik pisigaanni taava pisiap allagartaanik pissarsinissat imaluunniit assersuutigalugu mobilepayikkut akiliuteqarnikkut uppernarsaatissarsinissaq politiit kaammattuutigaat, nuussinerit taamaalillutik paasiniarneqarsinnaallutik.

Qullermik ikumatitsigit angalaninnillu assinik ikkussinngikkallarit

Tillinniarfigitilluni misigisaq nuanninngitsuuvoq. Nammineq pigisamik annaasaqartoqartarpoq, aamma inuit nalusarluinnaat angerlarsimaffinnut isertarput.

Tillinniartoqannginnissaanullu arlalinnik piareersaarsoqarsinnaasoq, Julie Senderovitz oqarpoq.

Angerlarsimannginnermi illup iluani silamilu qullermik ikumatitsisoqarsinnaavoq.

Aaamma angalaninnit assinik saqqummersitsinissat angerlarnissannut utaqqisillugu.

- Facebookikkut malinnaaffiginneriarlutik angerlarsimannginnerannik paasisaqarsimanerannik ilaatigut naammattuuisarpugut.

Matup parnaarnissaata eqqaamanissaa aamma siunnersuutissaavoq, tillinniarnerimmi arlallit angerlarsimaffiup matuata parnaaqqannginnerani pisarput. Ataatsimut isigalugu tillinniat sukkasuumik takuneqarnatillu isipallannissaat ajornartinniarneqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat