Facebook toortakkamik 'nuannarinngilara'-mik atuutilersitsiniartoq

Facebookimi allaaserineqartunik naammagisaqannginnermik ersersitsisinnaanermut periarfissaqarnissartik Facebookimik atuisut ukiuni arlalinni ujartorpaat.

Inuilli attaveqaqatigiittarfiata toortakkamik "nuannarinngilara"-mik ("synes ikke om") atuutilersitsinissani maannamut akueriumanngissinnarlugu maanna taamaaliornialerpoq.

Facebookip San Fransciscomi qitiusoqarfiani tamanut ammasumik akunnermi ataatsimi apeqqarissaartorneqarnerani Facebookip tunngaviliisuata pisortaaneratalu Mark Zuckerbergip toortakkap "nuannaraara"-p (synes godt om) allamik aapperniarneqarnera nalunaarutigaa.

- Ullumikkut ulloq immikkut ittuuvoq, ullumikkummi oqarsinnaalerpugut atuutilersinniarneqarnera sulissutigalutigu, Zuckerberg taama oqarpoq.

Allaaserineqartut nuannarineqannginnerinut isumaqatigineqannginnerinulluunniit ersersitsinissamut periarfissamik atuutilersitsinissaq taassuma sivisuumik akerlerisimavaa, iluarinngisaqartoqarpallaalernissaa Facebookip tungaanit aarleqqutigineqarnera pissutigalugu.

Toortagarli "nuannarinngilara" aamma misiginneqataanermik  ersersitsiniarnermut atorneqarsinnaasoq, Mark Zuckerbergip maanna tunngavilersuutigaa.

- Atuisut misiginneqataanertik ersersikkusuttarpaat, pisummi tamarmik nuannersuuneq-ajorput.

- Alianartunik allaaserisat nuannaralugit ersersitsinissaq tulluanngitsutut misinnarsinnaavoq, naak immaqa ikinngutit ilaqutaasullu paasinninnertik ersersinniaraluaraat, Mark Zuckerberg taama oqarpoq.

Toortagaq "nuannarinngilara" qanorpiaq atorneqarsinnaassanersoq aammalu qaqugorpiaq atuutilersinneqassanersoq nalunarallarpoq.

/ritzau/