Facebook oqaluuserisaasa ilagaat

Ilulissani meeqqat inuusuttullu ataatsimeersuarneranni peqataasut suleqatigiinni assigiinngitsuni suliaqarlutik ullumi aallartipput, ilaatigut takorluukkat, imminut tatigineq, ilinniartitaaneq inuillu attaveqaqatigiittarfii, soorlu Facebook, isummanik avitseqatigiinnermut sakkussiarineri suleqatigiinni eqqartorneqassapput.
Assi © : Jørgen Chemnitz/Nakuusa
Allattoq Mads Fisker
oktobarip 19-at 2011 10:37

Inuusuttut ataatsimeersuaqataasut 38-it nunaqarfimminnit illoqarfimminniillu ujaqqanik nassataminnik suleqatigiinni sulinnginnerminni inussulioqqaarput.

Ujaqqani allassimapput meeqqat inuusuttullu pisinnaatitaaffiisa atugaasalu nukittorsarnissaannut isummat. Ilaat allappoq angajoqqaat meeqqaminnik killiliisassasut, allalu allassimalluni angajoqqaat meeqqallu peqatigiinnissaminnut piffissaqarnerusariaqartut.

Meeqqat inuusuttuaqqallu ataatsimeersuarnerat tallimanngorpat tungaanut ingerlanneqassaaq, inuusuttut naalakkersuinermik suliaqartunut naggataarutaasumik innersuussassaannik suliaqassapput, taannalu Ilaqutariinnut, Kultureqarnermut, Ilageeqarnermut Naligiissitaanermullu Naalakkersuisumut Mimi Karlsenimut tallimanngorpat tunniunneqassaaq.

Ataatsimeersuarnermit Ilulissani tusagassiortutsinnit unnugu Radioaviisimi tusagassaqartitsissaagut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq