Fabrikkimi sulisoq: Arnat angutillu suliffimmi naligiinnerat nuanneqaaq
Raajat puussianut issorarneqarlutillu karsinut poortuunneqarput.
Poortuisut ilaat Ulloriannguaq Hansen 22-nik ukiulik uumareqaluni poortuivoq, taassuma angutit arnallu suleqatini assigalugit poortuisarfimmi nillataartumi kiillilerluni plastikkimik saaliaquserluni nutsanilu poorsimallugit Royal Greenlandip fabrikkiani qaamatinngulersoq sulivoq.
Arnat angutillu naligiissitaanermut politikkeqarnerat Ulloriannguup torragilluinnarpaa.
-Ajunngivippoq, arnat angutillu suliassai suliarisarpavut, massakkut arnat suliassaat suliarerujoorpavut.
Arnat sualerisarput, oqitsunik suliaqarlutik, angutit karsit oqimaatsut aalisakkallu qerisut passuttarpaat.
Poortuisut sukkasuumik suligaangamik, ullormut raajat tonsingajaat poortuisarfimmi poortortarpaat, ullumikkullu tamanna angussangatinngilaat, tassami ullup qeqqata missaani nipisat suai tikiunneqassapput taakkulu ulapputigalugit aallartissavaat.
Ullumikkut aningaasarsiffiummat sulisut allaffiliallattaapput, taamaammallu qungujulaartunnguaqarpoq.
Ingerlatsinermut ikiorti Henriette Bistrup suliffissarsiortunik tigooraasarpoq, taassumalu pingaartippaa suliffissarsiortunik arnanik angutinillu amerlaqatigiikannersumik tigooraanissi.
-Maani naligiittorujussuupput, arnat arfineq marluk/- arfineq pingasut missaanniipput, angutillu aqqaneq marluullutik.
Sullittullu ataqatigiinnerat poortuisarfimmi ersareqaaq, tamatumuuna Ulloriannguaq Hansen karsinik raajanik immereersimasunik nipinneqqusersuisoq aperaarput naligiissitaaneq atuunnersoq.
-Tassa ingerlalluarpoq, ajunngivippoq.
Ulloriannguaq Hansen naggasiivoq.