Savaatillit nunap panernersua pillugu ikorneqarnissamik utaqqipput
Nerukkaatissanik immikkut pissarsiniarnissamut ullumi ulloq periafissani kingullerpaavoq. Arlallilli aningaasat pissutigalugit taamaaliornissamut tunuarsimaarput.
Nunatta Kujataani savaatillit 40-it sinneqartut annertuumik ajornartorsiorput, kingullermik siallerneraniit qaammatit marluk sinnerlugit qaangiupput.
Panernersuup nerukkaatissanik naatitsiniarneq ajutoortippaa, nersutaatinullu nerukkaatissat amingaataapput. Naallu nerukkaatissanik 1800 tonsinik augustip 12-anni pissarsisoqaraluartoq suli annertunerusunik pisariaqartitsitisoqarpoq.
Qaqortumi nerukkaatissanik nioqquteqartartoq Múte Bourup Egede taama oqaluttuarpoq, taassuma savaatillit peqatigiiffiat peqatigalugu nerukkaatissanik pissarsiniaqqinnissaq aaqqissuuppaa.
Killiffik asuliunngikkaluartoq, savaatilippassuit nerukkaatissanik pissarsiniarnissamut tunuarsimaarput. Aningaasaqarniarnermummi sunniutai allaat aningaasanik atorniarnissamik kinguneqartitsisinnaapput.
Aamma atuaruk Nunaatillit panernersuaqarneranit eqqugaasut
Aalisarnermut, Piniarnermut Nunalerinermullu Naalakkersuisoqarfik savaatillit qinnuigisimavaat aningaasatigut tapiinissamut periarfissanik misissueqqullugu, Múte Bourup Egede KNR-imut oqaluttuarpoq.
- Maanna saaffiginnissut Naalakkersuisoqarfimmiippoq. Namminersorlutik Oqartussat arlaatigut ikorsiisinnaanngippata, savaatillit amerlasuut
ukiamut nersutaatiminnik malunnaatilimmik ikililiisariaqassasut, Múte Bourup Egede oqarpoq.
Savaatillit nerukkaatissanik pissarsiniarnissaannut oqallisissatut siunnersuut Aalisarnermut, Piniarnermut Nunalerinermullu Naalakkersuisoqarfimmi maanna naammassiniarneqarpoq.
Siunnerssuut Naalakkersuisuni sapaatip akunnerata tulliani oqallisigineqassaaq.