EXPO-mut Nunarput akissaqanngilaq
Lana Hansenip erseqisarpaa, Kinamiut aningaasaateqaraluttuinnartut, Nunattalu eqqummaarinnerulluni EXPO 2010 nittarsaassinermut atortariaqaraluaraa.
EXPO 2010, Shanghaimi Kinamiittumi maajip aallaqqaataaniit oktobarip naanera ilanngullugu ingerlanneqartussaq, nunanit 200-nit ikinnerunngitsunik peqataaffigineqassaaq. Aamma aaqqissuisut naatsorsuutigaat, inuit 70 millioninit ikinnerunngitsut takuniaajumaartut. Tassalu nunarsuarmiunut saqqummersitsisarnerit aallartimmatali aatsaat taama amelatigisut takuniaassapput.
- Kina pisuunngoraluttuinnarput, tuniniaavissaavorlu, alliartuinnartoq pilernartorluni. Taamaammat Nunarput EXPO 2010-mi imminut nittarsaanniassagaluarpat pissusissamisoorsuinnassagaluarpoq, Lana Hansen oqarpoq.
Kisianni inuussutissarsiornermut naalakkesuisoq, Ove Karl Berthelsen, oqarpoq, Naalakkersusut EXPO 2010-mut aningaasanik illuartitsisimanngitsut.
- Qanoq sivisutigisumik qanorlu annertutigisumik peqataanissaq apeqqutaalluni 3 millioner koruunit tikillugit aningaasartuteqarsinnaaneq ilimagineqarpoq, taakkualu aningaasaanut inatsimmi ilaanngillat, Ove Karl Berthelse oqarpoq
Lana Hansenili uteriiserpoq, oqarluni 2010 kalaqallinut inuiannut saqqummerfissatsialaaasoq.
- Nunatsinni inuussutissarsiortunut, tunisassiortunut takornariartitsisunullu najuuneq pitsaqutaassagaluarpoq, Lana Hansen oqarpoq.
Nunatta Ammeriviali ingerlanerliortoq aamma Expo 2010-mi ilaaniarani aalanangersimavoq.
Ukiuni kingullerni amingartoortarpugut, aningaasanillu sukannersumik aqutsisariaqarluta. Taamaammat siusinnerusukkut niueqatigisartakkagut aallunniarlugit aalajangersimavugut, pisortaq Henrik Estrup oqarpoq.
Tassalu Kinami peqataaneq iluaqutaanavianngitsoq, Nunatta Ammerivia naliliivoq.
Ove Karl Berthelsen tamatumunnga isumaqataavoq.
- Kingullermik EXPO-mi ilaanermi pissarsiat aammalu aningaasartuutinut sanilliullugit sunniutaa annikippalllaarpoq, Ove Karl Berthelsen oqarpoq.