Politikki

Exit poll: Aleqa ippassaq ajugaavoq

Siumup siulittaasuata, Aleqa Hammondip, aamma Inuit Ataqatigiit siulittaasuata, Kuupik V. Kleistip, Nuummi Ilimmarfimmi ippassaq unnukkut oqallitsinneqarneranni, nalunaaquttap-akunnerata aappaa avillugu sivisussusilimmi, oqallinnerup aallartinnginnerani kinguninngualu tusarnaartut isummaminnik saqqummiussinissaminnut periarfissinneqarput.

Allattoq Carla Davidsen

februaarip 27-at 2013 07:02

Misissuititsipallannermi tusarnaartut 150-it amerlanersaat isumaqarput Naalakkersuisut siulittaasunngorniuttoqarnerani Aleqa Hammond oqallinnermi iluatsitsilluarnerusoq.

Allattuiffissat tusarnaartut 125-t immersorpaat, qinersisartullu marsip ulluisa aqqaneq-aappaanni kimik qinersissallutik suli aalajangersimanngitsut 46 procentii oqallinneq naammassimmat isumaqarput, Aleqa Hammond ajugaasoq, Kuupik V. Kleist 29 procentit toqqarpaat, 25 procentillu isumaqarput oqallinnermi ajugaasoqaranilu ajorsartoqanngitsoq.

Misissuisitsisut nassuerutigaat misissuineq sukumiinerulaartariaqartoq.
Qinersinermi kimik/kikkunnik qinersissanerlutik ilisimannereersut 63 procentiisa oqallinnerup aallartinnginnerani neriuutigaat Kuupik V. Kleist qinersinermi ajugaassasoq, 37 procentit Aleqa Hammondip ajugaanissaa neriuutigigaat. Agguataarinerlu taanna oqallinneq naammassimmat allanngunngilaq.

Misissuisitsinermi Ilinniagartuutut Ilinniartut Kattuffiat, KISAQ, aaqqissuisuuvoq, ulloqeqqaaneranilu Radioaviisimi kisitsisit sukumiinerusumik sammiumaarpavut.

Exit poll: Aleqa ippassaq ajugaavoq

Aamma atuaruk