Qeqqata Kommuniani 2020 aallarnerfigalugu kikkulluunniit suli 18-iliinngitsut akeqanngitsumik timersortalersinnaanngussapput.

Evelyn Frederiksen: Meeqqat inuusuttullu aanngajaarniutit alarlugit timersorneq saassavaat

Qeqqata Kommuniata meeqqat inuusuttullu imigissamik ikiaroornartumillu atuisuunnginnissaat anguniarpaa.

- Ullumikkornit nalunngilarput inuiaqatigiinni ajornartorsiutitta annerpaartarigaat assigiinngitsutigut atuisuulertarneq. Taannalu akiorniassagutsigu periarfissiissutit pitsaanerusut inuiaqatigiinni periarfissiissutigisariaqarpagut.

Qeqqata Kommuniani Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliap siulittaasoraa Evelyn Frederiksen oqarpoq.

Qeqqata Kommuniani 2020 aallarnerfigalugu kikkulluunniit suli 18-iliinngitsut akeqanngitsumik timersortalersinnaanngussapput.

Meeqqat peqqinnerusut

Island taamaaliornissamut isumassarsiviuvoq. Islandimimi pissutsit takutippaat, meeqqat inuusuttullu timersortaliaarsimasut peqqinnarnerusumik inuusaaseqalersartut.

AAMMA ATUARUK Qeqqata Kommuniani meeqqat inuusuttullu akeqanngitsumik timersorsinnaalertut

Kiisalu meeqqat atuarfiini atuartunik misissuinerup 2018-imeersup kisitsisaatai suliniummut soqutiginnilersitsipput.

- Tassani misissuisimanermi takutinneqarpoq ukiukillutik suli tupamik, ikiaroornartumik imigassamillu misileereersimalersartut. Tamanna annikillisaaviginiarlugu ilaatigut taamatut aalajangernikuuvugut.

Taassuma iliuuseqarfiginiarnerata saniatigut Kalaallit Nunaanni Timersoqatigiit Kattuffiata angunigaa Qeqqata Kommuniata tapersersorusuppaa:

- Kalaallit Nunaanni Timersoqatigiit Kattuffiata anguniagaa 2030-imi nunat tamalaat akornanni nunarput timimik aalatitsinerunerpaaffiusussaasoq taanna aamma tapersersorusullugu taamatut aalajangerpugut.

Suleqatigiinneq

Suliniulli aamma illuatungeqarpoq. Qeqqata Kommuniami inuusuttut 14-ileereersimasut unammiuaarnernut pissartanngorniunnernullu peqataallutik tapiiffigineqartartut inuiaqatigiinni ajunngitsuliorlutik ikiuuttarnisaannut malittarisassaliorpoq. Soorlu suliffeqarfiit silataanni aputaajaanikkut, utoqqarnik ikiuinikkut, asimik saligaatsuutitsinikkut allanilluunniit suliaqarnikkut inuiaqatigiinni ajunngitsuliorlutik ikiuunnikkut.

Suliniullu iluatsissappat angajoqqaat, meeqqat inuusuttullu, timersoqatigiiffiit assigisaallu suleqatigiilluartariaqartut, Evelyn Frederiksenip oqaatigaa.

Suliniutip kommuninut allanut siammarnissaa, taassuma neriuutigaa.

- Tassami Kalaallit Nunaanni Timersoqatigiiffiit Kattuffiata anguniagaa pitsaasoq tamatta tapersissagutsigu arlaatigut tamatta iliuuseqalaarnitsigut soorunami angunissaa qaninnerussammat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat