Eva Joly Islandimi pinerluttorsiulerpoq
Islandimi illoqarfiit pingaarnersaanni Reykjavikimi ippassaq tusagassiortunik katersortitsinermi Eva Joly oqarpoq, aningaaseriviit ajutoornerannut akisussaasut nassaarinissaat eqqartuunneqarnissaallu suliamini pingaarnersasoq.
Sulinini aningaasaqarnermik suliallit parnaarussaanerannik kinguneqariaannaanerarpaa.
- Suliara ukiut pingasut qaangiutsinnagit eqqartuussinernik kinguneqassasoq naatsorsuutigaara, Eva Joly oqarpoq.
Misissuinerup taama sivisutigisinnaanerannut pissutaanerarpaa aningaasanik peqquserluttoqarsimatillugu iternga tikillugu misissuisoqartariaqartarnera. Aarleqqutiginngivippaali piffissap ingerlanerani uppernarsaatinik suujunnaarsitsisoqarsinnaanera.
- Ullutsinni suulluunniit niueqatigiissimanernut tunngasut qarasaasiatigut paasissutissartaqartuaannartarput. Akisussaasut toqqortersinnanngillat. Suut peqquserluutaasinnaajunnartut saqqummillarumaarput. Eva Joly, Islandip radioani RÚV-imi apersorneqarnermini oqarpoq.
