Europarådet: Inissinneqarsimasut nappaataannut nalunaarsuiffiit atuarneqartarneri ajornartorsiutaasut
Taama oqarpoq Europaråde-mi inuit naalliutsinneqartarnerisa akiorniarneqarnissaannut suliniaqatigiiffimmi ilaasortaq Stefan Krakowski.
Suliniaqatigiiffimmi ilaasortat nunatsinni pinerluuteqarsimasunut inissiisarfinni pissutsit paasiniarlugit siorna nunatsinnut tikeraarput. Suliniaqatigiiffiup nalunaarusiaa saqqummiunneqaqqammerpoq.
Inissiisarfinnut inissinneqartut nappaateqarsinneraannik misissuiffigineqarneq ajorput, naak tamanna pingaaruteqaraluartoq, tamannami napparsimanaveersaartitsinermut atorneqarsinnammat, Stefan Krakowski oqarpoq.
AnneMette Nyborg Lauritsen pinerluuteqarsimasunut inissiisarfiit pillugit ilisimatuussutsikkut misissuisimasoq oqarpoq, pinerluuteqarsimasunut inissiisarfinni peqqissaasunik nakorsamillu mississuisartussanik pisariaqartitsisoqartoq, tamannalu inuit naalliutsinneqartarnerisa akiorniarneqarnissaanut suliniaqatigiiffiup nalunaarusiamini taperserpaa, taakkua oqaramik pinerluuteqarsimasunut inissiisarfimmiittut nakorsamit peqqissaasumillu misissorneqartarnissaat pisariaqartoq.
Parnaarussivinni assigisaannilu inissinneqartut peqqissuunissamut ajornartorsiutitaat, inuiaqatigiit sinnerinut sanilliullugit nalinginnaasumik ajornerusarput.
Taamaattumik pingaaruteqarpoq, inissiisarfinnut inissinneqartut nakorsamit misissorneqarnissaat píngaaruteqarpoq aamma inissinneqartut tarnip pissusaanik ilisimasalimmit oqaloqatigineqartarnissaat taamaliornikkut imminut toqunnissaminnut eqqarsaateqalernissaat pinngitsortinneqassammat, Stefan Krakowski oqarpoq.
Pinerluuteqarsimasunut inissiisarfinni sulisut ilaat inissinneqarsimasut nappaataannik nalunaarsuiffiannik misissuisarput naak tamanna malittarisassanik unioqqutitsinerusoq Stefan Krakowski oqarpoq.
Taamaattumik ataatsimiititaliamit innersuussutigaarput, inissinneqartunut paasissutissat pineqartillugit nappaatinik nalunaarsuiffiit assigisaallu ilanngunneqartassanngitsut, Stefan Krakowski oqarpoq.
Nunatsinni pinerluuteqarsimasunut isumaginnittoqarfimmi pisortaanerugallartoq Michael Stage aamma inatsisit atortinneqarnerannut ministeri Morten Bødskov oqaaseqartinniarsimagaluarpagut.
Takkua Europaråde-mi inuit naalliutsinneqartarnerisa akiorniarneqarnissaannut suliniaqatigiiffiup nalunaarusiaa atuaqqaarniaramikku ullumikkut oqaaseqarsinnaannginnerarput.
