Europaparlamentip danskit avoqqaarai

Europa-Parlamentip maanna avoqqaarutigaa, CIA-p timmisartuutaasa isertortumik timmisartuussisarnerat pillugu ataatsimiittoqarnerani danskit ministeriat ataaserluunniit peqataasimanngimmat.

Isertortumik timmisartuussisarsimanerit pineqartut ilaatigut tassaapput CIA-p timmisartuutai nunatsinnut 40-riarlutik aqqusaarsimassangatinneqartut.

Tamanna pillugu misissuisoqarneranut ataatsimiititaliap Danmarki ataatsimiititaliamut tassunga ilaasortaatitaqarnera pillugu nalunaarusiamini nersualaarsimagaluarpaa. Akerlianillu maanna avoqqaarisoqalerpoq ajoraluaqisumik danskit naalagaaffianneersumik ataatsimiittussanngortoqarnerani takkuttoqarsimanngitsoq.

Nalunaarusiami erseqqissarneqarpoq CIA-p timmisartuutai minnerpaamik 1245-t europamiut silaannaatigut timmisartoqarfiinullu aqqusaartarsimasut.

Aammattaaq ataatsimiisitaliap tamanna pillugu misissuisinneqartup imaqarniliaq isertugaasoq NATO-p nunanut allanut ministeriisa siorna decembarip 7-iani ataatsimiinnerminni imaqarniliarisimasaat pissarsiarisimavaa.

Imaqarniliallu taassuma qulaarpaa, isertortumik timmisartuussisoqartarnera isertortumillu parnaarussisoqartarnera

NATO-mi ilaasortanit qangali ilisimaarineqarluareersimasoq, taama tamanna nutaarsiassaqartitsiviup ritzaup allaaseraa.