Europap kangisissuani Robin Hood nutaaq
Qarasaasiaq atorlugu unioqqutitsisartup - hackerip - nammineq oqarnera naapertorlugu pappiarat uppernarsaatit allanut takoqqusaanngitsut 7 millioninit amerlanerit Letlandip akileraartitsisarfianiit qarasaasiakkut aasimavai. Paasissutissat taakkua hackerip tamanut saqqummiussassanngortippai, taamaalillunilu suliffeqarfiit naalagaaffinnit pigineqartut, aningaaseriviit politikerillu ileqqorissaartuunnginneri qulaarlugit.
Soorlu Letlandimi aningaaseriviit ilaata sipaarniutiginiakkani, naalakkersuisunut neriorsuutigisimasani suliarisinnaasimanngilai, akerlianilli naalakkersuisut aningaasaliissutaannit ikiorneqarluni.
Pappiarat allat paasinarsisippaat suliffeqarfiit naalagaaffimmit pigineqartut bonusisitsisarsimasut peqatigisaanillu naalakkersuisunit ikiorneqarnissaminnik qinnuteqartarlutik, BBC taama allappoq.
Politikerit atorfilittallu aningaasarsiaannut, atorfinitsinneqarnerminnilu atugassarititaannut tunngassuteqartut aamma saqqumiuttarsimavai, taakkulugooq Letlandimi innuttaasunut atugassarititanit pitsaanerungaartumik atugaqarput.
Nunani EU-mut ilaasortaasuni Letland suliffissaaleqiffiunerpaajuvoq, suliffissaaleqisut 23 procentiullutik. Hackerip innuttaasunit tapersersorluarneqarnini tanngassimarutigeqaa, filmilianilu Matrix-ini pingaarnertut inuttaasutut Neo-mik imminut taasaraluartoq "Robin Hood"-imik taaneqartalerpoq.
Hackeri kinaanersoq ilisimaneqanngilaq, ilimagineqarporli maanna Tuluit Nunaanniittoq. TV-qarfissuup BBC-p nittartagaani tamanna allaaserineqarpoq.
Robin Hood Nanortalimmeersoq Angut Kleistimik ateqarpoq. Taanna Nanortalimmi eqqartuussivimmit decembarip naajartornerani pinngitsuutinneqarpoq. Eqqartuussulli unnerluussisup Nunatta Eqqartuussivianut suliareqqitassanngortippaa, qaquguli suliarineqarnissaa suli aalajangerneqarani.
