Europap kangiani innuttaasut millionit affangajai qimaapput

Naalagaaffiit Peqatigiit ikiuniaqatigiiffiisa nalunaarutigaat eqqissiviilliornerit innuttaasut qimarrannerannut peqqutaasoq.

Kirgisistanip præsidentiata Kurmanbek Bakijev-ip apriilimi uppisitaanerata kingorna nunami tassani eqqissiviilliornerit juunip qulingannili aallartipput.

Illoqarfik Osh eqqissiviilliortitsisunit saassutarineqarnerpaavoq.

Akersuuttoqarnerani 191-it toqutaapput, taakkua præsidentimut uppisitaasumut illersuisunit saassunneqarlutik toqutaasimanissaat naatsorsuutigineqarluni.

Eqqissiviilliortitsisut pinngitsaaliinissaannik toqutsinissaannillu akilerneqarsimapput, taamaaliornermikkut nunap immikkoortuata taassuma nalinginnaasumik ingerlasinnaanera unitsinniarlugu.

Kirgisistanimi usbekerit sakkortuumik saassunneqartarput, illui ikuallanneqartarlutik saassunneqarnermilu kingorna qimaasarsimapput nassataqaratik, Danmarkimi qimaasunik ikiuiniaqatigiiffimmi Dansk Flytningehjælpimeersoq Christian Gad taama allappoq.

Naalagaaffiit Peqatigiit siornatigut nalunaarutaanni qimaasut 75.000-iunissaat eqqoriarneqarpoq.

Qimaasut maannakkut 400.000-iusut oqaatigineqarpoq, taakkunannga 100.000-it killeqarfik aqqusaarsimavaat.

Qimaasut amerlasuut angerlarnissartik qunugaat, saassunneqarnissartik ernummatigigamikku.