Europamiut puallaraluttuinnarnerat peqqinnissaqarfinnut akisoqaaq

Europamiut puallaraluttuinnarput, tamannalu peqqinnissaqarfinnut akisoorujussuuvoq. Pualaneq pillugu misissuinermi apersuinermilu paasineqarpoq tamanna ajornartorsiutaangaatsiartoq.

Misissuinerup inerneri takuinnarlugit assortorneqarsinnaanngillat. Nunani suliffissuaqarfiusuni innuttaasut puallaraluttuinnarput.

Europami innuttaasut affai sinnerlugit oqimaassusissartik sinnerlugu oqimaassuseqarput. Ukiullu tamaasa pualavallaarneq toqqutigineqartarpoq.

Taamaakkaluartorli innuttaasut akornanni pualavallaarneq ernummatigineqarpallaanngilaq.

Nerisassanik tunisassiorfiup peqqissuseq timersornerlu pillugit Europami nunani arfinilinni innuttaasut 3000-t apersorsimavai. Nerisassat tunisassiarineqartut allagartalersorneqarneri innuttaasunit qanoq isumaqarfigineqarnersut kiisalu pualavallaarneq qanoq isumaqarfigineqarnersoq paaserusullugu tunisassiorfik apersuivoq.

Apersorneqartut amerlanersaasa nunaminni pualavallaarneq ajornartorsiutaasoq oqaatigaat, namminnerli ajornartorsiutiginnginnerartarsimallugu.

Nappaatit toqqutaasinnaasut 15-t akornanni pualavallaarneq toqqutaasinnaasut tallimaattut isigineqarpoq. Innuttaasut nappaassuarmik kræftimik eqqugaanissartik annilaanngatigineruaat, pualavallaarlutik toqquteqarnissaminnit.

Europami USA-milu pisortanit paasititsiniaanerit imaaginnavikkaluarput. EU-mit Naalagaaffiillu Peqatigiit peqqinnissakkut suleqatigiiffianit pualavallaaneq pillugu nalunaarusiat assigiinngitsut ukiut qulit kingulliit ingerlanerini paasititsiutigineqartarput.

USA-mi misissuinerup takutippaa pualavallaarnerup kingunerisaanik nappaatit anigorneqarsinnaanngitsut 37 procent sinnerlugu peqqinnissaqarfiup aningaasartuutiginerussarai.

Nerisassanilli tunisassiorfiup Craftip apersuinerata takutippaa innuttaasut namminneq pualavallaarnermik ajornartorsiuteqanngitsutut isigisartut.

USA-mi, Mexicomi Tuluillu Nunaanni innuttaasut pualavallaartut uppernarsineqareerpoq.