Europamiut eqqarsartaasiannit peqqissaasut kalaallit sunnerteqqapput
Kitaamiutut eqqarsartarneq paasinnittarnerlu aallartittarpoq meeqqat atuarfiini atuartuunermi aammalu ilinniarnertuunngorniarluni atuarnermi.
Meeqqat atuarfiini atuartuunermi ilinniarnertuunngorniarnermilu sorliit peqqissaasutut ilinnialissanersut nalunanngereertarpoq, Nuummi nakorsiartarfimmi nakorsaaneq Gert Mulvad oqarpoq.
Taanna nakorsat, peqqissaasut, ilisimatuut peqqissaqarfimmilu sulisut katillutik 213-t, Nunamed 2010-mik taasami, Nuummi ulluni makkunani ataatsimeersuarneranni, saqqummiussinerit ilaannit taama paasissutissiivoq.
Peqqissaasut kalaallit peqqissaasunngornissaminnik pimoorussisut, kitaamiut eqqarsartaasiannit periusaannillu sakkortuumik sunnertittarput, doktoritut soraarummeerutigineqartumi tamanna takutinneqarpoq.
Kisianni aamma misissuinerup takutippaa peqqissaasut kalaallit amerlasuut kulturikkut ileqqutik oqaatsitsillu pigiinnartaraat, taakkulu sulinerminni atorsinnaasaraat, Gert Mulvad oqarpoq.
Peqqissaasut kalaallit nunat kllermiut eqqarsartaasiannik periuseqarlutik sulisut ajortutut ajunngitsutulluunniit Gert Mulvadimit nalilerniarneqanngillat. Sulinerminni kulturikkut oqaatitsigullu piginnaasatik ilitsoqqussatillu atorluarlugit aamma sullitaminnut iluaqutigisarpaat, tamakkualu pingaaruteqarput, Gert Mulvad oqarpoq.
Peqqinnissaqarfimmi sulisut ataatsimeersuarnerat Nunamed 2010 ataasinngornerup tungaanut ingerlanneqassaaq.
Peqqinnissaqarfinni sulisut ataatsimeersuarnerminni NUNAMED 2010-mi ulluni tullerni oqaluuserissavaat Kalaallit Nunaanni sukkornermik nappaateqarneq sakiallunneq aammalu peqqissumik atoqatigiittarneq pillugit oqallisissallutik.
