Europami qarsutsinersuaq
Europap qiterpasinnerusortaani ulluni kingullerni sialussuartaqattaarnerup kingunerisaanik kuussuit qaffassimangaarmata 2002-mi qarsutsinerujussuaqarneranut assingullutik.
Tjekkiap Tysklandillu illoqarfiinit inuit 10.000-inik amerlanerit ullumi qimagussortinneqarput. Qatserisartut sakkutuullu tusintilikkuutaat qarsutsineq unitsinniarlugu sapusiorput. Østrigimi Tjekkiamilu ajunaarnersuaqarnissaa annilaagatigineqarmat ataatsimiittoqapallappoq. Najugaqarfinni amerlanerni qarsutsisoqarnissaa ukiut sisamat matuma siornamut naleqqiullugu sillimaffigineqarneruvoq.
Tysklandimi Dresdenip eqqaani Pirnami kuussuaq Elben ullup qeqqata missaani qarsutsimmat illoqarfiup nutaanngitsortaani illuni siullerni najugallit qimagussorneqarmata ajunaarnersuaqartoqartoq nalunaarutigineqarpoq.
Pragimi Moldau-ip kuussua atuarlugu sapusiarsuit angallattakkat ikkussuunneqarput. Tjekkiap illoqarfiisa pingaarnersaanni illuni tallimani najugallit qimagussorneqarput, Pragimilu uumasuusivissuarmi uumasut qimagussortinneqarnissaat eqqarsaatigineqarpoq. Uumasut 100-nik amerlanerit 2002-mi qarsutsisoqallarmat ipillutik ajunaarput.
