Europami qarsutsineq
Aputip aannerata siallerujussuaqattaarneratalu kinguneranik, Europap qeqqatigoortoq kuussuaq Donau, qarsutsisaqattaarpoq. Serbiami Rumaaniami Bulagariamilu inuit sapusiorlutik ulappukkaluarput, qarsutsinerilli pinngitsoorneqarsinnaanngimmata inuppassuit qimarngunneqarput.
Sialleqattaarnera aputillu aannerata kinguneraa kuussuup Donau-ip erngata marloriaammik qaffassinnerulersimanera. Beogradimi illoqarfiit ilaat qarsutsiffiuvoq, illorpassuillu qarsutsinermi aserulersimapput, illullu ilaat morsuuissimallutik.
Sapusiornerit ingerlanneqartaraluarput, amerlanertigulli iluaqutaavallaarneq ajorput. Rumaaniami Bulagariamilu imeq qaffakkaluttuinnarpoq, aqagumullu taamaaginnarallarnissaa ilimagineqarpoq. Danmarkimi
qimaasut ikiuiniaqatigiiffianneersoq Shana Jensen Beogradimut tikeraarsimasoq oqaluttuarpoq qarsutsineq ingasalluinnartoq.
-Tamaani takusakka tassaapput illut ilaat imermik morsungajavissimasut. Naak poorsuit sioqqanik immerlugit sapusiortoqarsimagaluartoq qarsutsisoqarpoq. Shana Jensen oqaluttuarpoq nangillunilu:
- Beogradimi qarsutsiffiuvallaanngitsuni soorunami silaannaq allaaneruvoq. Naak neriniartarfiit ilaanni imeq annertunngitsoq isaasimagaluartoq, suli neriniartoqarsinnaavoq. Illoqarfiilli ilaanni pukkunnerusumiittuni qarsutsiffioqaaq, innuttaasullu qarsutsiffiunngitsunut qimarngunneqarput.
Serbiap avannaani imeq 2 miiterit angullugit qaffassimavoq. Tallimanngormalli illoqarfiit arlallit innaallagiaqarsimanngillat, qarsutsiffiusunilu najugallit qimarngunneqarnerisa saniatigut, illut qimaannakkat politiinit nakkutigineqartut, DR-mit aamma oqaluttuarineqarpoq.
