Europami pissartaasimasoq Qaqortumi Nuummilu sungiusaalersoq
Nassuiaasartoq misilittagartooq, Morten Bruun sungiusaasunut pikkorissaanermi ilitsersuisuussaaq.
- Kalaallit Nunaanni sungiusaasunik pikkorissartitsinissama ingerlanneqarnissaanut qilanaaqaanga. Siornatigut Kalaallit Nunanniinnikuunngisaannarpunga, taamaakkaluartoq Aarhusimi timersomerrnermik højskolemi kalaallit inuusuttuaqqat arlalippassuit sullittarsimaqaakka.
- Ukiut tamaasa atuarfimmi Kalaallit Nunaanneersunik ilinniartoqartarpoq amerlasuutigullu arsaanneq toqqartarpaat. Kalaallit Nunaat pillugu oqaluttuartarnerisa arsaannermullu nuannarisaqartuunerisa Kalaallit Nunaanni arsaanneq takusaqarfigerusullugu tikeraarnissannut pilerisutsilersimavaannga, maannalu iluatsitseqaanga periarfissaqalerama, Morten Bruun, tusagassiorfinnut nalunaarummi taama allappoq.
Danmark 1992-mi EM-imi pissartanngormat Morten Bruun unammisartutut peqataavoq, unamminernili isertinneqarani. Taassumap saniatigut Silkeborg IF-imi ukiuni 13-ini arsaattartuusimavoq, taakkulu peqatigalugit 1994-imi Danmarkimi mesterinngorput, 2001-imilu pokalinnanniunnermi ajugaallutik.
Danmarkillu nunanut allanut unammisartuisa ullumikkut unamminerinut erseqqissunik nassuiaasuusarpoq, aamma spaniamiut tuluillu arsaattartuisa pitsaanerit unammineri tv-kkut aallakaatinneqaraangata. TV-mi ingerlataqarnermi saniatigut Aarhusimi timersornermik højskolemi arsaannermik ilitsersuisuuvoq IF Lysingimilu sunngiffimmini sungiusaasarluni.
Sungiusaasutut pikkorissartitsinerit Qaqortumi maajip 29-anit 31-anut ingerlanneqassapput, Nuummilu juunip tallimaanit arfineq-aappaata tungaanut ingerlanneqassallutik.
