Europameersut aamma peqquserluutigisarpaat
Biilinik atornikunik Canadamiit nunatsinnut eqqussuisartuni annersanut ilaavoq taaguutilik, Ray Fine Enterprises. Suliffeqarfimmik tassannga ingerlatsisoq, Josh Fine oqarpoq, tusaamallugu akileraarutinik akiliinikinnerunissaq anguniarlugu Canadamiinnaanngitsoq aammali Europamiit biilit eqqussuunneqartartut peqquserluutigineqartarsimasut.
- Tusaamavara, Canadamiit Kalaallit Nunaannut biilinik eqqussuisartut ilaasa akileraarutinik akiliinikinnerunissaq anguniarlugu peqquserluttarsimasut, aammali Amerika avannarlermiit europamilu Danmarkimit Tysklandimiillu biilit eqqussuutat peqquserluutigineqartarsimasut aamma tusaamavara, Josh Fine oqarpoq nangillunilu: - Inatsisit taamatut isikkoqartillugit inuit arlalissuit akiliinikinerunissaq anguniarlugu atornerluisarsimassapput. Aningaasanik isertitaqarnerunissaq, akileraarutinillu akiliinnginnerunissaq anguniarlugu akileraarutinik peqquserluttoqartarsimanissaa ilimanarpoq, taamaaliortarsimasullu pillarneqalerunarput, Josh Fine naggasiivoq.
Nuuk kisiat eqqarsaatigalugu ukioq kingulleq biilit atornikut Nuummut nunanit allaniit eqqunneqarsimasut 50-iupput, taakkunanngalu biilit eqqunneqartut pingasoraarterutai Josh Fine-ip biileerniarfianit Canadameersumit Ray Fine Enterprise-mit pisiarineqarsimapput.
Bileerniaq Josh Fine isumaqarpoq, taamatut misissuisoqalernera, nammineq biileerniartarnerminut eqquinavianngitsoq.
- Taamatut misissuisoqalernera uannut iluaqutaasinnaavoq, uagummi akileraatit pillugit peqquserlunnavianngilagut. Peqquserlunnissarmi uagutsinnut imminut akilersinnaanngilaq, ukiorpassuarnimi Kalaallit Nunaannut biilinik nioqquteqartarsimavugut, niueqateqartarnerpullu iluatinnartutut isigalugu. Equgaasussat tassaanerupput nammineerlutik biilinik Canadamut pisiniariarlutik peqquserluuteqarsimasut, immaqalu uagut biilinik niueruteqartarnitsinnut tamanna iluaqutaaginnassaaq, Josh Fine naggasiivoq.
Biilit eqqussuunneqartarnerinut atatillugu akileraarutinik peqquserluttoqartarsimanissaa pasitsaanneqarsimammat, sapaatip akunnerata tulliani bagmands politiit misissuiartorlutik tikeqqissapput.
