Danmark Europa-Parlamentimut qinersinermi aatsaat taama qinersiartortoqartigisoq

Danmarkimi qinersisartut pingasuugaangata ataaseq Europa-Parlamentimut qinersivoq. Venstrep Europa-Parlamentimi ilaasortai marloriaatinngorput Dansk Folkepartiilu kinguariangaatsiarluni.
EU-mut qularinnittut kinguariarnerannut Dansk Folkepartiip qinersinermi taaguunneqarpiannginnera pissutaaqataalluinnarpoq. DF-ikkormiut Christianborgimi katerisimaarfianni Peter Kofodip (DF) Anders Primdahl Vistisen eqippaa. Peter Kofoed qinigaavoq. Asseq: Scanpix Assi © : Foto: Scanpix
Allattoq Ritzau
maajip 27-at 2019 15:40
Nutserisoq Simon Uldum

Europa-Parlamentimut qinersiartortut amerlangaatsiarput. Danmarkimimi qinersisinnaatitaasut 66 procentii qinersiartorput. 

Tamannalu rekordiliinerivoq. Siornatigut rekordiusoq 2009-meersuuvoq, Europa-Parlamentimut taamani qinersisoqarmat qinersisinnaatitaasut 59,5 procentii qinersiartormata.

Venstre Europa-Parlamentimi sisamanik ilaasortaatitaqalerluni partiini Danmarkimeersuni anginersanngorpoq. Venstrep ilaasortaatitai 2015-imi qinersinermut naleqqiullugit marloriaatinngorput, taamaalillunilu Europa-Parlamentimi partiini Danmarkimeersuni anginersanngorpoq.

EU-mullu qularinnittut partiivisa kinguariarnerisigut EU-mut akuersaartut partiivi aqqaneq-marlunnik ilaasortaatitaqarsinnarlutik maanna 14-inik ilaasortaatitaqalernerat danskit ministeriunerata Lars Løkke Rasmussenip (V) maluginiarpaa.

EU-mullu qularinnittut kinguariarnerannut Dansk Folkepartiip qinersinermi taaguunneqarpiannginnera pissutaaqataalluinnarpoq.

Partiip kingullermik 2014-imi qinersisoqarmat sallersatut sassartitaa tassaavoq Morten Messerschmidt, partiilu taamani qinersinermi ajugaavoq sisamanik ilaasortaatitaqalerluni.

Partii taamani qinersisut 26,6 procentiinit qinerneqarpoq. Tamatumuunalu 10,7 procentiinnaapput, allaallumi partiip siulittaasuata Thulesen Dahlip illoqarfiani Thyregodimi DF-imik qinersisut affaannaanngorput.

Folkebevægelsen mod EU - EU-mut akerliusut partiiat - qinigaatitaqanngitsoorpoq, Enhedslistenilu siullerpaamik qinigaatitaqarpoq, tassaalluni partiip sallersatut sassartitaa Nikolaj Villumsen.

Socialdemokraatit ilaasortaatitani pingasut attatiinnarpai, De Radikalellu aamma SF-ip tamarmik immikkut ilaasortaatitatik ataatsimik ilavaat, maannalu marlunnik ilaasortaatitaqalerput.

Nunani allani partiit talerperliit siuariangaatsiarput. Assersuutigalugu Italiami, partii Lega ajugaasuulluni. Partii pineqartoq nunami namminermi pissutsinut ministerimit Matteo Salvinimit siulersorneqarpoq, partiilu qinersisut 34,5 procentiinit qinerneqarpoq.

Aviisi Corriene della Sera kisitsit Italiami nunami namminermi pissutsinut ministereqarfimmeersut tunngavigalugit ataasinngormat ullaakkut taama allaaserisaqarpoq.

Partiip EU-mut akerliusupilussuusup tapersersorneqarnini 2014-imi qinersinermut naleqqiullugu arfinileriaatinngortippaa, taamanimi qinersisut 6 procentiinit taamaallaat qinerneqarami.

Frankrigimi Le Penip partiia qinersisut 24 procentiinit qinerneqarpoq. Præsidentillu Emmanuel Macronip partiia, La République En Marche, 21,9 procentinit qinerneqarpoq.