Europa nunap inoqqaavisa kulturiannik aammaarluni nungusaaniarsarivoq
Allakkat EU-kommissionip siulittaasuanut, Europaparlamentip siulittaasuanut, EU-mi kommissærinut marlunnut, Danmarkimi ministeriunermut nunanullu allanut ministerimut nassiunneqarput.
Jonathan Motzfeldtip oqaatigaa Europamiut taamatut aalajangiiniarnerat, Issittumi ukiuni tuusintilikkaani kulturinik atuussimasunik toqqaannartumik atorunnaarsitseriarnerusoq. Jonathan Motzfeldt sooq ammasunik allagaqarnersoq aperaarput.
- Allagaqarpunga pissutigalugu sapaatip akunnerata tulliani Europaparlamentimi puisit amiisa inerteqqutigineqalernissaat aalajangiiffigineqartussaammat.
Aamma ilisimagakku naalakkersuisut allallu suliniarneri naammattumik paasineqarsimanngitsut. Isumaqarpunga oqaatsit taama ittut anittuarsimasavut, maannakkut aamma avatitsinnit paasineqarsinnaasunngorlugit, piffissaq kingulleq atorlugu apuunneqarnissaat pingaartorujussuusoq.
Ilaatigut angunuiarpara Monacomi issaannaq FN-ip ataani ataatsimiittoqarnerani puisinniarnermut tunngasumik aalajangersagassamik saqqummiussinikuugama. Tassani erseqqissarlugu ammit kisiisa atunngikkivut, kisianni puisit arferillu neqaat timmissallu ukiorpassuarni nerisaralugit inuussutigigivut. Inuusaaserlu taanna innarlerneqarpat, avammullu niuernikkut periarfissaarutsinneqarpat, taava aamma inuussutissarsiutitut nungukkiartornissaa ilimagisariaqarparput, Jonathan Motzfeldt oqarpoq.
Puisit amiinik nunanut allanut tunisisinnaanitta arfernillu angisuunik pisaqarsinnaatitaannginnitta Conquistatorit Amerikami Kujallermi ukiut 400-t matuma siornagut politikerisimasaasa assigerluinnarpaa.
- Taakkua assersuutigaakka. Tassa Conquistatorit avataaninngaanniit tikillutik indianerit inuusaasiannik kulturiannillu toqutsisimammata. Imaappoq indianerit ingerlaqqissinnaanerannit akornuseerujussuarsimapput. Oqaatsit tamakkua atorpakka, Europamiut unikaallallutik eqqarsarnissaminnut periarfissaqaqqullugit, Jonathan Motzfeldt naggasiivoq.
