Euromik atuiffik Kalaallit Nunaata marloriaatinngortissinnaavaa

Kalaallit qanoq isumaqarnerat nassuiarniarlugu aningaasaqarnermut naalakkersuisoq Palle Christiansen, Frankfurtimi Europap qitiusumik aningaaserivia upernaap ingerlanerani tikeraassavaa.

Kalaallit Nunaat EU-mut ilaasortaanngilaq. Taava sooq ilaasortaananilu euromik atuinissamik soqutiginnissava? Palle Christiansenip ilaatigut tamakku nassuiassavai.

- Piareersaatitut sulinitsinni paasivarput Frankrigip siornatigut nunasiaatigisimasai nunallu imarpiup illuatungaaniittut ullumikkut naalakkersuinikkut Frankrigimit kommunitungajak naatsorsuunneqartut, euromik atuinissamut akuerineqarsimasut. Maanna uagut namminersorneq eqqussimalerparput taamalu kommunitut, amtitut Danmarkimiluunniit naalakkersuisoqarfittut isigineqarsinnaajunnaarluta, taamaattorli Danmarkimik suli naalagaaffeqatiginnilluta. Taamaattumik taama inissisimanerput pissutigalugu qanoq iliorsinnaanerluta Europap qitiusumik aningaaserivianit tusarusupparput.

Europami qitiusumik aningaaseriviup Kalaallit Nunaanni euromik atuinissaq soqutiginartissanerpaa?

- Maani uagut pisiniartussatigut tunngavissarissaanngikkaluarpugut, isumaqarpungali Europami qitiusumik aningaaseriviup nunarsuatsinni nunat euromik atuisut annertuseriarnissaat soqutiginartissagaa, tassami euromik atuiffiusunut Kalaallit Nunaat ilanngutissappat, nunarsuup ilaa euromik atuiffiusoq marloriaatingajanngussammat, tassami euro Amerikap avannarliup nunavittaa tikivillugu killileqalersussaammat, Palle Christiansen oqarpoq.

Koruuni Europamiut aningaasaannik taarserneqassappat qallunaat amerlanerussuteqartut euromik akuersillutik taasisariaqassapput.