EU: Tyrkia ilaasortanngussanersoq ataatsimiissutigissavarput

EU-mi siuttut qaammatip tulliani naapeqatigiissapput naapeqatigiinnerminnilu Tyrkiap EU-mi ilaasortanngorniarnerani isumaqatigiinniartoqaqqissanersoq eqqartorneqassaaq. EU-mi Tyrkiamilu innuttaasut amerliartuinnartut Tyrkiap ilaasortanngornissaanut akerliupput. Taamaattorli Tyrkiap isumaqatigiinniarnermi siuttuata, massakkut Danmarkimiittup, Tyrkiap EU-mi ilaasortanngornissaa kissaatigaa illuatungeriillu Tyrkiap ilaasortanngornerannik iluanaaruteqassasut taassuma ilimagaa. Isumasiuinerilli malinneqartuuppata ukiorpassuarni ilaasortanngortitsiniarluni isumaqatigiinniartarnerit unitsineqassagaluarput.

EU-mi innuttaasut amerlanerit Tyrkiap ilaasortanngornissaa kissaatiginngilaat. Tyrkiami innuttaasut 60 procentiisa EU-mi ilaasortanngornissartik ilimagiunnaareerpaat. Danmarkimilu innuttaasut aamma ilaasortanngortitsisoqarnissaanik kissaateqarnerat killeqalersimasoq malunnarpoq.

Tyrkiap EU-mi ilaasortanngorniarnera unitsinneqassanersoq EU-mi siuttut sapaatip-akunnerata tulliani eqqartussavaat. Tyrkiap EU-mi ilaasortat ilaata Grækenlandip qeqertaasa ilaat Cypern Tyrkiap ilaasortanngorniarnermini akunnattoorutigisaraa arlaleriarluni takuneqareerpoq. Tyrkiami naalakkersuisut isumaqatigiinniartitaasa siuttuata isumaqatigiinniarnissat neriulluarfigai. Taannalu upperluartuugami evangeliumik issuaalluni isumaqatigiinniarnerit iluatsissaqqaarnerarpai nangillunilu:

- Tyrkiami naalakkersuisut anguniakkatik pimoorullugit suliniuteqarput; inatsisartuni ilaasortat sulinngiffeqarnissatik tamaasa unitsillugit EU-mi inatsisinut tulluarsaapput. Tyrkiamut tikeraarsimasut ukiut arlallit qaangiuppata tikeraaqqikkunik pissutsit takusimasatik ilisarinavianngilaat. Sulisut amerliartorneranni ukiumut akileraarutitigut agguaqatigiisillugu isertinneqartartut 8 procentimik amerleriarput. Inuit pisinnaatitaaffii unioqqutinneqarpiarneq ajorput. Taamaattumik Tyrkia EU-mi ilaasortanngortariaqarpoq, Tyrkiami naalakkersuisut isumaqatigiinniartittagaasa siuttuat naggasiivoq.