EU suleqatiginerorusuppaat

Aalisarnermut isumaqatigiissut kisiat isumalluutiginagu periarfissanik allanik suleqatiserinnittoqartariaqartoq qineqqusaartut marluk isumaqarput.

Aalisarnermut isumaqatigiissut EU-mi Kalaallit Nunaatalu akornanni allanngortinneqassagaluarpat taava Kalaallit Nunaata siunissami EU sumut atorsinnaavaa? Apeqqut taanna akissutissarsiniarlugu

Partiinut marlunnut Atassummit Siumumilu Folketingimut qinigassanngortittunut akissutissarsiorparput.

Atassummit qinigassanngortittoq Ellen Christoffersen siunissami EU ima atorneqarsinnaasoraa:

- Atassummit ataqqivarput EF-mit anisimagatta. Maannakkut siunnerfigaarput EU assigiinngitsutigut suleqatiserineqarsinnaassasoq. Assersuutigalugu sanaartugassat tungaasigut inerisaanissamut tapiissutinik pissarsiniarsinnaanissamut, aamma nukissiuutit piorsaaffigineqarnissaanut, ilisimatusarnikkut suleqatigiissinnaanikkut, minnerunngitsumillu niueqatigiinnikkut angallassikullu ujartuinissaq EU suleqatigalugu Atassummit pingaartipparput, Ellen Christoffersen oqarpoq.

Siumumit qinigassanngortittup Ole Aggu Markussenip piffissanngorsoraa periarfissat maannamiit atorneqarnissaat:

- Siumumit isumaqarpugut OLT-mik aaqqissuussisimaneq ullumikkornit annertunerujussuarmik periarfissai atorluartariaqarigut. Aamma niuernikkut inerisaanissaq, EU-mut niuernikkut attaveqaaatitta annertusarneqarnissaa, kisiannili aamma nunarsuarmut tamarmut, Ole Aggu Markussen oqarpoq, nangillunilu.

- Oqallinnermi uani isumaqarpunga partiit ilaasa oqallineq imaalersikkaa, qanoq ililluta EU-mit tapiissutinik pisinnaanersugut. Tamanna allanngortittariaqarpoq. Uanga isumaqarpunga suliassarput allaasoq, tassalu namminiilerneq, soorlu suliffeqarfinnik pilersitsiortornikkut, namminersortuunerup nuannissusaanik pilersitsinikkut, ilinniarnikkut qaffassarnissarput. Utaqqisariaqanngilagut aallartiinnartariaqartugununa, Siumumit Ole Aggu Markussen naggasiivoq.