EU Ruslandilu isumaqatigiikkunnaavipput

EU-mi Ruslandimilu qullersat ullumi ataatsimiinneranni inuit pisinaatitaaffii eqqartorneqartillugit, russit ministeriunerat EU-kommissionillu siulittaasua, Barroso assortuutivissortarput.
Allattoq Elisa Isaksen
februaarip 06-at 2009 16:59

Russit Georgiamiullu qaammatit arfinillit matuma siorna sorsuutillatsiarnerisa, Russillu EU-p tungaanut gassip aqqutaanik matusigaluarnerisa kingorna, ullumi qullersat ataatsimiinnerminni tatigeqatigiilernissaminnik siunertaqaraluarlutik, assortuutivissortaleraluarput. EU-kommissionip siulittaasuata, Jose Manuel Barroso-p Ruslandimi inuit pisinnaatitaaffii isornartorsiortillugit, inuit pisinaatitaaffii pillugit suliniutillip, inatsisilerituup allallu tusagassiortup qaammat kingulleq toqunneqarneri immikkut eqqaammagit, Russit ministeriunerat, Putin isornartorsiorneqarusunneq ajortoq puffalluni, EU-mi ilaasortat namminneq inuit pisinnaatitaaffiinik unioqqutitsisarnerarpai.

Ataatsimeereerlutik tusagassiortunik katersuutsitsinerminni Putinip puffassimaaqaluni EU-mi ilaasortat avataaniit nunasiniartunut pissuserisaat, paarnaarussivinni pissutsit kiisalu Baltikumimi russit ikinnerussuteqartut pissusilersorfigineqarnerat, inuit pisinnaatitaaffiinik unioqqutitsinerunerarlugit sakkortuumik isornartorsiorpai. Tassunga Barroso oqaannarpoq aamma namminneq kukkusarlutik.

Taamannak ersarissumik imminnut isorigaluarlutik Ruslanndip EU-llu akornanni pissutsit ilorraap tungaanut ineriartortinnissaat isumaqatigiissutiginerarpaat.